Parlament Májilisiniń depýtaty Daniia Espaeva elimizdegi qabyldanǵan ekonomikalyq qadamdarǵa qatysty pikir bildirdi, dep habarlaidy "Ult aqparat".
«Memleket basshysynyń biylǵy Joldaýy áleýmettik salany, sondai-aq ekonomikalyq bloktaǵy reformalarǵa qatysty naqty mindetterdi aiqyndady. Usynylǵan reformalardyń biri Básekelestikti qorǵaý jáne damytý agenttigin qurýǵa qatysty boldy.
Bul óz kezeginde qalyptasqan jaǵdaida qajet bolyp turǵan sheshim edi.
Ekonomikadaǵy monopolizatsiialanýdyń jalǵasýy jalpy ekonomika men qoǵamnyń ary qarai damaýyna tosqaýyl bolatyny anyq. Osy oraida qaita qurylǵan agenttik kontsentratsiianyń ózgerýi men naryq qatysýshylarynyń qysqarýyna alyp kelgen salyqtyq ári qarjylyq jáne basqa da shamadan tys talaptary bar sektorlarda memlekettik retteýdi qaita qarastyrýmen ainalysady dep oilaimyn», - dedi D. Espaeva.
Onyń aitýynsha, tótenshe jaǵdaidy engizý aiasynda Prezident ekonomika men kásiporyndardy saqtaýǵa ári jandandandyrýǵa, sondai-aq halyq tabysyn qalpyna keltirýge yqpal etetin birqatar sharaǵa qatysty jigerli sheshim jasady. Bul sharalar biznesti qoldaýǵa baǵyttalyp, salyqtyq jáne nesielik yntalandyrý túrindegi qoldaý eskerildi. Sáikesinshe, tiisti qadamdarǵa memleket tarapynan qomaqty qarajat bólinip, ońtaily nátije boldy.
«Meniń oiymsha, biyl qyrkúiekte jariialanǵan Joldaý shaǵyn jáne orta biznesti qorǵaýǵa yqpal etetin bolady. Sebebi osy turǵyda qajetti sheshimder pysyqtalǵany anyq. Bank sektorynda qyzmet etken maman retinde zardap shekken shaǵyn jáne orta biznes sektorlarynyń barlyq nesieleri boiynsha paiyzdyq mólsherlemelerdi sýbsidiialaýdy qoldaimyn», - dedi depýtat.
Onyń sózine qaraǵanda, tótenshe jaǵdai engizilgennen beri jáne karantin merziminde «Aq jol» partiiasy kásipkerlerge naqty kómek jasaý boiynsha Úkimetke birneshe márte ótinimder joldady.
«Sondyqtan Prezidenttiń ekonomikanyń zardap shekken barlyq sektorlarynda qoldanystaǵy kreditteri boiynsha paiyzdyq stavkalardy jyldyq 6 paiyzǵa deiin memlekettik sýbsidiialaý arqyly qosymsha kómek kórsetý sheshimi qazirgi jaǵdaida naqty qoldaý bolyp otyr», - dedi D. Espaeva.
Onyń paiymynsha, biznesti qoldaýdyń barlyq sharalary halyq tabysynyń artýyna yqpal etedi ári der kezinde jasalýda. Alaida, qabyldanyp otyrǵan sharalardyń mańyzdylyǵyn eskere otyryp, «Aq jol» partiiasy shaǵyn jáne orta biznesti memlekettik qoldaý qadamdaryn jetildirý qajet dep sanaidy.
Budan bólek depýtat Strategiialyq josparlaý jáne reformalar agenttiginiń qurylýyna qatysty pikir bildirdi.
«Atalǵan agenttikti qurý eki mańyzdy maqsatty qamtidy dep oilaimyn. Bul turǵyda memlekettiń uzaqmerzimdi ekonomikalyq ári áleýmettik saiasatyn, sondai-aq Ministrler kabineti jumysyna baǵalaý júrgizýdi qamtamasyz etedi», - dep atap ótti D. Espaeva.
.jpeg)