Búgin Túrkistan qalasynda Elbasy Nursultan Nazarbaevtyń «Nur Otan» partiiasynyń XVIII sezinde bergen tapsyrmalaryn oryndaý boiynsha partiianyń oblystyq filialynyń aktiv májilisi ótti. Jiynda óńirdegi partiia filialynyń ókilderi men basqarma basshylary, ziialy qaýym ókilderi el áleýetin kóterý baǵytynda pikir almasty, dep habarlaidy "Ult aqparat" aimaq ákimdiginiń baspasóz qyzmetine silteme jasap.
Jiynda Túrkistan oblysynyń ákimi Ómirzaq Shókeev turǵyndardyń áleýmettik jaǵdaiyn kóterý baǵytyndaǵy jumysty júieleýdi tapsyrdy.
«On jyldai ýaqyt salyp ózderińizben qaita qaýyshqanyma qýanyshtymyn. Túrkistandy damytý baǵytynda jumystar atqarylyp jatyr. Biz sol jumystardy jalǵastyryp qana qoimai, qarqynyn arttyramyz. Elbasymyz Nursultan Nazarbaevtyń qazaqstandyqtardyń ál-aýqatyn arttyrý baǵytyndaǵy tapsyrmalary Túrkistan oblysynyń áleýmettik-ekonomikalyq damýyna tikelei áser etedi. Sebebi oblysymyz kópbalaly analar sany boiynsha respýblikada aldyńǵy qatarda tur. Ár balaǵa 21 myń teńge kóleminde járdemaqy berilýi - jerlesterimizge oń yqpalyn tigizetini sózsiz. Biz osy áleýmettik kómektiń berilý sharty men merzimi tolyq júielengenshe oblysta áleýmettik zertteý júrgizip, kómekke muqtaj otbasylardy anyqtaýymyz kerek. Árbir aýdan, qala ákimderi ózderi basqaratyn aýmaqtaǵy kópbalaly jáne az qamtylǵan otbasylardy anyqtasyn. Sol turǵyndardy kómekpen jáne jumyspen qamtý sharalary kúsheitilsin. Jumys tobyna «Nur Otan» partiiasynyń ókilderi de kirip, tizimniń ádil jasalýyn qadaǵalaýy qajet. Turǵyndar áleýmettik kómek alý úshin mekemelerdiń tabaldyryǵyn tozdyrmai, járdemaqyny ýaqtyly alýy tiis», - dedi Ómirzaq Shókeev.
Sonymen birge, óńir basshysy biýdjettik mekemelerdegi eń tómengi jalaqy alatyn jumysshylardyń sany men olarǵa jumsalatyn qarjyny tolyq esepteý jóninde tapsyrma berdi. Jergilikti atqarýshy organdarda qyzmet etetin mamandardyń jalaqysyn kóterý úshin uiymdardyń shyǵystaryn ońtailandyrý jáne únemdeý sharalary atqarylyp, faktorly-ball shkalasy júiesi engiziletinin aitty.
Sondai-aq kópbalaly otbasylardy turǵyn úimen qamtý, tómen paiyzben baspana berý baǵytynda jumystar júielenedi. Óńirdegi qurylys jumystaryna otandyq materialdar qoldanylyp, jergilikti turǵyndardyń jumyspen qamtylýy da baqylaýda bolady. Oblys basshysy jurtshylyqty osy baǵytta birlesip jumys isteýge shaqyrdy.
«Árbir aýdan-qalanyń damý tujyrymdamasy qaitadan júielensin. Oblystaǵy gazdandyrý, aýyz sýmen qamtý, infraqurylym salalary boiynsha atqarylatyn isterdi tikelei qadaǵalap, eldiń áleýetin kóteretin jumystarmen tikelei ainalysamyn. Elbasymyz usynǵan «Baqytty otbasy», «Aýyl - el besigi», «Qutty meken» jobalary boiynsha da naqty ári sapaly usynystar qajet. Ataýly áleýmettik kómektermen másele sheshilmeidi. Biz sol úshin oblystyń barlyq aýmaǵynda jumys oryndaryn ashýǵa kúsh salýǵa mindettimiz. Bul jumystardyń basy-qasynda «Nur Otan» partiiasy da júredi», - dedi aimaq basshysy Ómirzaq Shókeev.
