Qazaqstan óńirlerine kómir tasymalyn qamtamasyz etý úshin vagondar sany jetkilikti. Bul týraly búgin Úkimet úiinde ótken baspasóz máslihatynda «QTJ - Júk tasymaly» AQ-nyń prezidenti Oralhan Qulaqov aitty, dep habarlaidy QazAqparat.
«2017 jyldyń 10 aiy ishinde «QTJ» UK» AQ 83,9 mln tonna kómir tasymaldady. Bul ótken jylǵy deńgeiden 11 mln tonnaǵa nemese 15 paiyzǵa artyq. Qazaqstandyq tutynýshylar úshin el ishinde 56,6 mln tonnasy tasymaldandy. Bul ótken jylǵy deńgeiden 17 paiyz kóp. Biylǵy jyldyń sońyna deiin 107 mln tonna kómir tasymaldaý josparlanyp otyr. Bul ótken jylǵy deńgeiden 17 paiyzǵa artyq», - dedi kompaniia basshysy.
Onyń aitýynsha, kompaniianyń Qazaqstan óńirlerine kómir tasymalyn qamtamasyz etý úshin vagondar sany jetkilikti. Qazirgi kezde «QTJ» UK» AQ parkine «QTT» AQ ashyq vagondar parki tartylǵan. Olardyń úlesi Qazaqstandaǵy ashyq vagondardyń jalpy parkiniń 40 paiyzdan astamyn quraidy.
«Kómir qorlaryn ýaqytyly jinaý boiynsha ákimdiktermen birlesip júrgizilgen jumystardyń arqasynda Qazaqstannyń barlyq jylý elektr stansalary qajetti kómir qory deńgeiimen qamtamasyz etildi. Kommýnaldyq-turmystyq kómirdiń jetispeýshiligi tóńiregindegi ahýal óńirlerde halyqqa arnalǵan kómirdi satyp alý jáne bólýmen kásipkerlik qurylymnyń ainalysýynan týyndaýda. Kei jaǵdaida olardyń jekemenshik vagondary, kómirdi saqtaý jáne teńdei bólý úshin qajetti qoimalary joq», - dedi ol.
Qulaqovtyń paiymynsha, aldaǵy ýaqytta kómir tapshylyǵyna qatysty mundai jaittyń oryn alýyna jol bermeý úshin halyq otyndy mamyr aiynan bastap satyp alýlary qajet.
«Kómir jetkizýge bailanysty jaǵdai kúndelikti qadaǵalanyp otyrǵandyǵyn basa aitqym keledi. Kómir tasymalyna tapsyrystyń qamtamasyz etilýine táýlik boiy baqylaý jasalyp, onyń ishinde kommýnaldyq-turmystyq sala da qamtylǵan», - dedi Qulaqov.
