Foto: telegram / Konstitýtsiialyq Sot
Bir palataly Parlament úlgisi men memlekettik organdardyń jańartylǵan júiesine arnalǵan erejeler jańa Konstitýtsiia jobasynyń birneshe bólimderine engizildi. Bul jóninde Konstitýtsiialyq komissiianyń kezekti otyrysyndaǵy sózinde Qazaqstan Respýblikasy Konstitýtsiialyq Soty Tóraǵasynyń orynbasary Baqyt Nurmuhanov málimdedi, dep habarlaidy Ult.kz .
Onyń aitýynsha, bir palataly Parlament modeline arnalǵan normalar tórtinshi «Quryltai» degen bólimde jinaqtaldy. Onda zań shyǵarý organynyń ókilettikteri bekitildi, sonymen qatar Quryltaidyń sessiialaryna jáne onyń qyzmetin uiymdastyrýǵa qatysty baptardyń barlyǵy derlik jańartyldy.
«Zań shyǵarý bastamasy quqyǵyna ie sýbektilerdiń qatary anyqtaldy. Quryltai zań qabyldaý arqyly retteletin asa mańyzdy qoǵamdyq qatynastardyń tizbesi berildi. Zań jobalaryn qaraý men qabyldaýdyń rásimderi kózdeldi. Quryltai Tóraǵasynyń laýazymyna qatysty máseleler jeke bapta retteldi» - dep Baqyt Nurmuhanov atap ótti.
Konstitýtsiia jobasynyń besinshi bólimi «Úkimetke» arnalyp otyr.
«Bir palataly Quryltaiǵa kóshýge bailanysty kóptegen erejeler naqtylandy. Olar Úkimet pen onyń músheleriniń Quryltai aldyndaǵy jaýaptylyǵy men esep berý, senimsizdik votýmyn bildirý, Quryltaiǵa zań jobalaryn engizý, respýblikalyq biýdjet jáne onyń atqarylýy týraly esep berý máselelerine bailanysty bolyp otyr», - dedi ol.
Baqyt Nurmuhanovtyń sózinshe, altynshy bólim eki baptan turady jáne Qazaqstan Halyq Keńesine qatysty máselelerdi retteidi.
«Quramyna el azamattary kiretin bul joǵary konsýltativtik organ Qazaqstan halqynyń múddesin bildiredi. Onyń Quryltaiǵa zań jobalaryn engizý, respýblikalyq referendým taǵaiyndaý týraly usynysqa bastama jasaý jáne basqa da mańyzdy ókilettikteri belgilendi», - dep atap ótti.
Jeke, jetinshi bólimde «Konstitýtsiialyq Sotqa» qatysty normalar shoǵyrlandyryldy.
Baqyt Nurmuhanov Konstitýtsiialyq Sottyń quramyna, sýdialardyń ókilettik merzimderine jáne quzyryna qatysty normalar negizinen saqtalǵandyǵyn málimdedi.
Osy oraida Konstitýtsiialyq Sottyń konstitýtsiialyq baqylaý júrgizetin jáne búkil el aýmaǵynda Konstitýtsiianyń ústemdigin qamtamasyz etetin táýelsiz memlekettik organ retindegi missiiasy belgilendi.
