Premer-ministr Asqar Mamin álemde koronavirýstyń jańa shtamy – "omikronnyń" taralýyna bailanysty tapsyrma berdi, dep habarlaidy Sputnik Qazaqstan.
"Jalpy, epidemiologiialyq jaǵdai turaqty dep aitýǵa bolady. Infektsiialyq jáne reanimatsiialyq oryndardyń júktelýi 19 protsentti qurap otyr. "Jasyl" aimaqta 15 óńir, "sary" aimaqta – eki óńir, olar – Pavlodar men Soltústik Qazaqstan oblystary. Degenmen, sanitariialyq-epidemiologiialyq talaptardy saqtaýdy, ásirese, memlekettik shekarada jalǵastyrý qajet. Kóptegen elderde jańa shtamǵa bailanysty naýqastanýdyń kezekti tolqyny bastalyp jatyr", - dep atap ótti Mamin.
Osy oraida Úkimet basshysy virýstyń jańa shtamy álem boiynsha tez taralyp jatqanyn erekshe atap ótti.
"Osyǵan bailanysty ǵimarattardyń ishinde jáne qoǵamdyq kólikte maska kiiýge, adamdar kóp jinalatyn jerlerde áleýmettik qashyqtyqty saqtaýǵa asa nazar aýdarý qajet", - dedi Mamin.
Premer-ministr vaktsinatsiia men revaktsinatsiia sharalaryna basa mán berý qajettigin de jetkizdi.
Qazirgi kezde, shamamen, 9 million adam vaktsinanyń birinshi dozasyn saldyrdy. Bul 18 jastan asqan halyqtyń 80 protsentin quraidy. Osy ýaqytqa deiin 8,4 million adam vaktsinalaýdyń tolyq kýrsynan ótti.
