Sońǵy aptalarda balalar arasynda koronavirýs juqtyrý jaǵdailarynyń sany artty. Bul týraly «Pediatriia jáne balalar hirýrgiiasy ǵylymi ortalyǵy» AQ basqarma tóraǵasy Riza Boranbaeva aityp berdi, dep habarlaidy QazAqparat.
«Sáýir aiynyń basynan beri 2 940 bala aýyryp qaldy. Bul - 2 sáýirden bastalatyn málimetter. Al qazirgi ýaqytta koronavirýs infektsiiasy diagnozymen 275 bala tirkeldi. Onyń 41-i aýrýhanaǵa jatqyzyldy. Qalǵany úide emdelip jatyr. Sońǵy aptalarda balalarda koronavirýs aýrýynyń ósýi baiqalady», - dedi Riza Boranbaeva.
Onyń pikirinshe, aýrý sanynyń ósýin kezekshi synyptarmen bailanystyrýǵa bolmaidy.
«Sebebi, naýqas 275 balanyń 182-si – mektep oqýshysy bolsa, 15-i – balabaqshaǵa barǵan balalar. Onyń ishinde 62 bala kezekshi synyptarda oqydy, sáikesinshe 120 bala qashyqtan oqyǵan. Iaǵni, kezekshi synyptarda oqityn balalar ǵana emes, qashyqtan oqityn balalar da aýyryp jatyr. Sonymen birge, olardyń arasynda mektep jasyna jetpegen balalar da bar», - dep túsindirdi dáriger.
Sondai-aq, dáriger balalardyń koronavirýs infektsiiasynyń aýyr formasymen eresekterge qaraǵanda sirek aýyratynyn eske saldy.
«Balalar arasyndaǵy aýrýdyń óz erekshelikteri bolady, kóp jaǵdaida balalar simptomsyz nemese jeńil túrde aýyrady. Máselen, qazir balalardyń 86% simptomsyz nemese jeńil formada aýyryp jatyr. Aýyr syrqat túrleri balalardyń jasynda óte sirek – oǵan negizinen sozylmaly patologiiasy bar balalar ǵana shaldyǵady», - dep qorytyndylady Riza Boranbaeva.
Aita keteiik, ótken táýlikte koronavirýs infektsiiasy belgileri bar pnevmoniianyń 10 jaǵdaiy jáne 1 ólim jaǵdaiy tirkeldi. Oǵan qosa 17 adam emdelip shyqty.
1 tamyzdan bergi statistika: aýyrǵandar - 36 931, 395 ólim jaǵdaiy tirkeldi, al jazylyp shyqqandardyń sany 28 548 jetti.
