Kezekshi synypqa sabaq bergen muǵalimniń qashyqtan oqytýǵa da quqyǵy bar. Bul týraly QR Bilim jáne ǵylym ministri Ashat Aimaǵambetov aitty, dep habarlaidy QazAqparat tilshisi.
Ortalyq kommýnikatsiialar qyzmetindegi baspasóz máslihatynda ministrge kezekshi synypqa sabaq beretin muǵalimderdiń qashyqtan oqytýyna tyiym salynyp jatqandyǵy aitylǵan bolatyn.
«Buǵan jol berýge bolmaidy. Qashyqtan oqytatyn formatta da, kezekshi toptarda da jumys isteýge múmkindigi bar pedagogterdiń sabaq berýge quqyǵy bar», - dedi ol.
Onyń atap ótýinshe, buǵan deiin bastaýysh synyp muǵalimderinde bir stavkaǵa saǵat jetpei qalý problemasy bolǵan. Máselen, úlgilik oqý josparyna sáikes, birinshi synyptarda aptasyna 24 saǵat beriledi. Alaida aǵylshyn tili, dene shynyqtyrý syndy sabaqtardy basqa muǵalimderdiń berýine bailanysty bastaýysh synyp ustazynyń ortasha júktemesi 15-16 saǵatty qurap, 18 saǵatqa, 1 stavkaǵa da jetpegen. Al qazir jaǵdai ózgerip otyr.
«Qazir biz synypty bóletin bolamyz. Aitalyq, synypta 30 oqýshy bar. Búgingi jaǵdaida kezekshi synypta oqytý barysynda olar atalǵan synypty 15 baladan eki shaǵyn topqa bólýge mindetti. Soǵan orai pedagogke júkteme de artady. Degenmen, pedagog qosymsha jumysy úshin qosymsha aqy da alady. Iaǵni, eger qazirgi ýaqytta onda 28 saǵat bolsa, pedagog barlyq 28 saǵat úshin jalaqy alady», - dedi Ashat Aimaǵambetov.
