Nursultan Nazarbaev Qazaqstan halqyna biylǵy Joldaýynda memleketten bólingen qarajat tiimdi ári maqsatty túrde jumsalýy tiistigin taǵy eskertti, dep habarlaidy QazAqparat tilshisi.
«Túrkistan oblysynyń bir aýdanynda 600 oryndyq mektep 600 mln teńgege salynyp jatsa, týra sondai mektep basqa jerde 1 mlrd 200 mln teńgege turǵyzylyp jatyr. Bul qalai bolǵany? Úkimet keide mektep qajeti joq jerge aqsha bóledi. Ákim nege ondai talap qoiady? Al mektep jetpei jatqan jerge aqsha bólinbei jatady. Ulttyq ekonomika ministrligi buǵan nege jol beredi? Sebebi, dál qurylys alańynda ter tókpegendikten, jaǵdaidy jiti bile bermeidi. Sen, (Ulttyq ekonomika ministri Timýr Súleimenov - avt.) qai jerde úsh aýysymmen balalar oqyp jatqanyn, qai jerde mekteptiń baryn bilýiń kerek! Men árbir ministr úshin jumys isteýim kerek pe?», - dedi Prezident.
Memleket basshysy Timýr Súleimenovke ministr bolǵany úshin qarjyny únemdeýdi bilýi tiistigin eskertti.
«Al sizder únemdeýdiń ornyna shashpalyqqa jol beresizder. Keide tańǵalamyn. Keibireýler biýdjettiń aqshasyna túpsiz bóshke sekildi qaraidy. Ol jerden aqshany ala berýge bolatyn sekildi. Jyldyń sońynda igerilmegen qarajat milliardtap qalady. Qarasha-jeltoqsanda ol qarajatty ońdy-soldy jumsap, bazany bosatyp, kelesi jyly odan da kóp qarajat alǵysy keledi», - dedi Prezident.
Elbasy osyǵan bailanysty Esep komiteti baqylaýdy qataitatynyn eskertti.
Aita ketsek, QR Prezidenti Nursultan Nazarbaev Aqordada Qazaqstan halqyna Joldaýyn jariialady. Strategiialyq qujat elimizdiń áleýmettik-ekonomikalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnalǵan.
.jpeg)