Úkimet basshysynyń orynbasary Eraly Toǵjanov halyqty taǵy da karantin sharalaryn qatań saqtaýǵa shaqyrdy, dep habarlaidy "Ult aqparat".
«Koronavirýs jańa shyndyqty kórsetti desem, artyq aitqanym emes. Bul - bizdiń ultymyzǵa ǵana emes, búkil álemge qater tóndirip otyrǵan úlken qaýip. Ǵasyrlar boiy bizdiń halqymyz el basyn qosatyn kóptegen dástúrdi ustanyp keldi. Toi-jiyndy, qudalyq sekildi salttar bizde burynnan bar. Biraq búgingi jańa syn-qaterlerge beiimdelýimiz kerek. Ashyǵyn aitqanda, qazir keibir ustanyp júrgen dástúrlerimiz búgingi qaýipke qarama-qaishy. Ýaqytsha bas tarta tursaq, halyqqa bul igi bolary sózsiz», - dedi Úkimet basshysynyń orynbasary Eraly Toǵjanov OKQ-da ótken baspasóz máslihatynda.
Eraly Toǵjanovtyń aitýyna qaraǵanda, aýrýdyń qaýipi týraly bes aidan beri aitylyp jatyr.
«Biz barynshy qatań, barynshy túsindirip te aityp jatyrmyz. Tyiym da saldyq. Soǵan qaramastan áli de qarapaiym saqtyq normalaryn elemei otyrmyz. Oblystardy aralap shyǵyp, ol máselelerdi aitqan edim. Qazir ashyǵyn aitqanda toqtaý kerek. IIM-niń resmi derekterin keltire ketsem, 4,5 myńnan astam túrli zańbuzýshylyqtar anyqtalyp otyr. Onyń ishinde toilar da, qudalyqtar da, týǵan kúnder de bar. Toiǵa da baramyz, qonaqqa da baramyz. Biraq onyń bárin toqtatý kerek», - dedi ol.
Eske sala ketsek, keshe Memleket basshysy Qasym-Jomart Toqaev epidemiologiialyq ahýaldy turaqtandyrý jóninde keńes ótkizip, karantin sharalaryn eki aptaǵa uzartýdy tapsyrǵan bolatyn.
Memlekettik komissiia otyrysynyń qorytyndysy boiynsha Qazaqstanda karantin sharalary eki aptaǵa uzartyldy.
