"QR Prezident kýbogy úshin hokkei týrniriniń resmi ashylýy astanalyq «Barys» pen qytailyq «Kýnlýn Red Star» komandasy arasyndaǵy oiynmen bastaldy. Alaida matchtyń úshinshi minýtynda Damir Ryspaev tóbeles shyǵardy. Onymen qoimai, qytailyq komandanyń birneshe hokkeishisin soqqyǵa jyǵyp, zapasta otyrǵan oiynshylarmen de jaǵa jyrtysty. Sóz joq, bul onyń «Barys» pen «Kýnlýn» arasyndaǵy joldastyq kezdesý kezinde qarsylas komandanyń áreketi úshin alǵan óshi boldy. D.Ryspaev sol kezdesýge qatysqan joq. Alaida keshegi oiynda esesin tolyǵymen qaitardy deýge bolady", - dep habarlaidy Baq.kz tilshisi.
Joldastyq oiynda qarsylas komandanyń hokkeishisi «Barystyń» shabýylshysy Dastin Boidty muz aidynynyń bortyna qatty soǵyp, jaraqat salǵan edi. Osy soqqydan keiin D.Boid tura almady. Ony zembilmen alyp ketýge týra keldi. Sodan «Barystyń» hokkeishileri ashýǵa mindi. Daniiar Qaiyrov birinshi bolyp qarsylastyń hokkeishisin soqqynyń astyna aldy. Osydan keiin Madiiar Ibraibekov, Aleksandr Lipin, Konstantin Pýshkarev, Nikita Ivanov pen Ivan Kýchin jappai tóbeles úshin aiyp ýaqytyn óteýge májbúr boldy.
Al keshegi oiynda muz aidynyna shyqqan Damir Ryspaev aldymen slovak Tomash Martsinkony shyqshyttan bir berip, nokaýtqa jiberdi. Medikter ony zembilmen alyp ketti. Osydan keiin Damir qytailyq komandanyń hokkeishilerin bir-birlep sabaýǵa kóshti.
Bas kezinde slovak Tomash Martsinkonyń miy shaiqaldy degen aqparat boldy. Alaida keiin dárigerler ol málimetti joqqa shyǵardy. Soǵan qaramastan, Qurlyqtyq hokkei ligasynyń basshylyǵy «Barystyń» qorǵaýshysy Damir Ryspaevqa liganyń negizgi oiyndary bastalǵansha týrnirlerge qatysýǵa tyiym saldy. Demek, Prezident kýbogy aiaqtalǵansha jankúierler Damirdi kóre almaidy. Degenmen, tamyzdyń 23-i kúni bastalatyn Qurlyqtyq hokkei ligasynyń kezekti maýysymy aiasynda «Barys» men «Kýnlýn» áli talai ret kezdesedi. D.Ryspaev osy oiyndarǵa qatysa alady.
Al keshegi matchtan keiin «Barys» hokkei klýbynyń resmi habarlama jariialady. Oǵan sáikes, keshegi oiynǵa aiyzy qanbaǵan jankúierler bilet aqshasyn qaitara alady, ia bolmasa, týrnir aiasyndaǵy basqa matchqa aiyrbastaýǵa bolady. «Biletti aldaǵy úsh kúnde – 9,10 men 11-i kúnderi "Barys" arena kassalarynda saǵat 11:00-20:00 aralyǵynda aiyrbastaýǵa nemese aqshasyn alyp ketýge bolady», - delingen resmi habarlamada.
Aita keteiik, búgin týrnir aiasynda «Barys» klýby «Matellýrg» (Novokýznetsk) komandasymen kezdesedi.
