Egde jastaǵy turǵyndy óltirdi degen kúdikpen eki shopan ustaldy. Oqiǵa Kerbulaq aýdanynda bolǵan. Bul týraly "Jetisý" gazeti málimdedi.
«Keshki saǵat 18:00 shamasynda Kerbulaq aýdandyq politsiiasyna óriste zorlyq-zombylyq belgileri bar er adamnyń máiiti tabylǵany týraly habarlama kelip tústi. Atalǵan fakt QR Qylmystyq kodeksiniń 99-baby 1-bóligi «Adam óltirý» boiynsha tirkeldi. Oqiǵa ornyna shyqqan jedel-tergeý toby Ile aýdanynyń 65 jastaǵy turǵynynyń denesin anyqtady. Áieliniń aitýy boiynsha, ol Jarkent qalasyna seriktesin alyp kelý úshin ketken. Jedel-izdestirý is-sharalaryn júrgizý barysynda Kerbulaq aýdandyq politsiia bastyǵynyń orynbasary, politsiia maiory M.Qydyráliniń basshylyǵymen jergilikti oryndardy qaraý barysynda JPB jedel ýákilderi, politsiia aǵa leitenanttary Týraliev A. jáne Seiitjan A. Qońyróleń aýylynyń mańynda jolda kele jatqan mas adamdy kúdikti retinde ustady. Sýretke túsirip alyp, taný úshin jábirlenýshiniń áieline usynǵan. Ustalǵan adam kisi óltirgenin moiyndady jáne ekinshi shopanmen qaityp kele jatyp, úsheýi ishimdik ishkenin aitqan», - delingen Almaty oblystyq politsiia departamenti baspasóz qyzmeti taratqan habarlamada.
Politsiia aqparatyna sáikes, er adamdar arasynda janjal jumysqa tólenetin aqshanyń azdyǵynan týyndaǵan. «Keiin ekeýi birge marqumdy tunshyqtyrǵan. Telefon men aqshany alyp, máiitti dalaǵa tastap, jábirlenýshiniń kóligimen ózderi ketip qalǵan. Urlanǵan aqshaǵa ishimdik satyp alyp, ishýdi qaita jalǵastyrǵan. Qońyróleń aýylynyń mańynda kólik synǵan. Ekinshi kúdiktini, Panfilov aýdany Sholaqai aýylynyń 44 jastaǵy turǵynyn politseiler marqumnyń kóliginde uiyqtap jatqan jerinen tapqan. Kúdiktilerdiń ekeýi de qamaýǵa alyndy», - dep tolyqtyrdy politsiianyń baspasóz qyzmeti ókilderi.
Belgili bolǵanyndai, olardyń biri buryn bótenniń múlkin urlaǵany, sonyń ishinde, mal urlaǵany úshin birneshe ret sottalǵan. Ekinshisi maskúnem retinde tirkelgen. Sotqa deiingi tergep-tekserý barysynda is QR Qylmystyq kodeksiniń 99-baby, 2-bóligi, 7-tarmaǵymen «bir top adamdarmen jasalǵan adam óltirý qylmysy» retinde qaita qaraldy.
