Qazaqstannyń Syrtqy ister ministrligi Resei jýrnalisi Tigran Keosaianǵa non grata personasy statýsyn berý protsesin bastady. Bul týraly vedomstvonyń baspasóz hatshysy Aibek Smadiiarov málimdedi, - dep habarlaidy "Ult aqparat".
"Sol kúni Keosaiandy elimizge kirýge ruqsat etilmegen tulǵalar tizimine engizý protsesin bastadyq. Diplomatiialyq tájiribede keide mundaidy qoldanamyz", - dedi Aibek Smadiiarov.
Esterińizge sala keteiik, 24 sáýirde Keosaian YouTube-arnasynda video jariialaǵan. Onda ol qazaqstandyqtar "Ýkrainaǵa qarap, jaqsylap oilanyńdar, oń-soldaryńdy durystap tanyńdar" degen maǵynada ún qatqan.
Sondai-aq 9 mamyrda ótetin áskeri sherýdiń toqtatylýyna kóńili tolmaitynyn aityp, Reseidiń "jaýapty tulǵalary" "qarym-qatynas deńgeiin qaita qaraýy kerek" ekendigin málimdegen edi.
Keiinirek Qazaqstan Syrtqy ister ministrligi reseilik jýrnalist Tigran Keosaiannyń Qazaqstan týraly málimdemesine qatysty pikir bildirgen bolatyn.
«Reseilik jýrnalist Tigran Keosaiannyń qorlaityn, obektiv emes sózderi nazarymyzdy aýdaryp otyr. Múmkin, onyń málimdemesi Resei qoǵamy men saiasi isteblishmenttiń belgili bir bóliginiń kózqarasyn kórsetetin shyǵar. Biraq elderimiz arasyndaǵy yntymaqtastyq rýhy men mazmunyna jáne memleket basshylary deńgeiindegi kelisimderge múldem sáikes kelmeidi. Mundai sózder tatý kórshilik qarym-qatynasymyzǵa selkeý túsiredi jáne strategiialyq seriktestigimizge qarsylarǵa qolaily bolmaq. Ol Qazaqstanǵa kelýi quptalmaityn adamdardyń tizimine engiziledi dep oilaimyn», - degen edi Aibek Smadiiarov.
Tigran Keosaian - RT telearnasy, "Rossiia segodnia" halyqaralyq aqparat agenttigi jáne Sputnik aqparat agenttiginiń bas redaktory Margarita Simoniannyń kúieýi.
