Bala tárbiesine arnalǵan ata-analar kitaphanasyn jasaý qajet. Mundai pikirdi M.Áýezov atyndaǵy Ádebiet jáne óner institýtynyń direktory Kenjehan Matyjanov bildirdi, dep habarlaidy QazAqparat.
«Otbasy dep aita bergennen, otbasy tárbiesin jaqsartaiyq degennen eshteńe shyqpaidy. Eń aldymen, otbasydaǵy tárbieniń kontentin kúsheitýimiz kerek. Máselen, qazir jas analalar balalaryna tárbie bergisi keledi. Biraq, birde-bir oqý quraly joq. Sondyqtan ata-anaǵa balany qalai tárbeleý, qalai tamaqtandyrý, qalai baǵyp-qaǵý kerek degen máselege arnalǵan Ata-analar kitaphanasyn jasaǵan jón. Sonda ǵana otbasyna azdaǵan bolsyn kómek kórsetemiz. Buǵan qosa, balabaqshalarda kontent te jetisip turǵan joq. Balabaqshada ulttyq tárbie beretindei qazaq ertegilerinen bastap, mýltfilmder áli kúnge jetispeidi. Tárbieshilerdiń jaǵdaiyn da qarastyrý kerek. Olardyń jalaqysyn eń joǵary deńgeige kóterýge tiispiz», - dedi ol Otbasy kúni aiasynda ótken dóńgelek ústel otyrysynda.
Onyń dereginshe, Finliandiiada joǵary oqý oryndaryna túsken kezdegi eń joǵary konkýrs «balabaqsha tárbieshisi» mamandyǵyna bolady.
«Balanyń miynyń, jalpy daǵdylarynyń qalyptasýy 3 jasqa deiin júredi. Sol sebepti otbasydaǵy tárbie erekshe mán berýge turarlyq dúnie. Eger biz otbasyn jóndep alar bolsaq, onda keleshektegi balabaqshanyń jaǵdaiy da, mekteptiń de jaǵdaiy túzeledi», - Kenjehan Matyjanov.
