Video kadr
Túrkistan oblysy Kentaý qalasynda qymyzhanada bolǵan gaz jarylysy saldarynan aýyr jaraqat alǵan 20 jastaǵy Baqdáýlet Musa aýrýhanada kóz jumdy. Onyń denesiniń 90 paiyzy kúiip qalǵan. Qaiǵydan qan jutqan marqumnyń jaqyndary oqiǵaǵa jaýaptylardyń ádil jazalanýyn talap etip otyr, dep habarlaidy Ult.kz.
Qaiǵyly oqiǵa 1 qańtar kúni bolǵan. Gaz ballonynyń jarylýynan dámhanada órt shyǵyp, aspaz bolyp jumys istegen Baqdáýlet pen 18 jastaǵy Dana Saǵynǵaliqyzy aýyr kúiik alǵan. Ókinishke qarai, qyz oqiǵa ornynda qaza tapsa, Baqdáýlet 8 kún boiy jansaqtaý bóliminde jatyp, 9 qańtar kúni túnde kóz jumdy.
Marqumnyń týystary dámhanada órt sóndirýge arnalǵan qural bolmaǵanyn aitady. Olardyń sózinshe, otqa oranǵan jigitti sol sátte qymyz quiyp óshirýge májbúr bolǵan.
Baqdáýlet Musa – alty balaly otbasyndaǵy tórtinshi bala. Ol Shymkent qalasyndaǵy joǵary oqý oryndarynyń birinde dene shynyqtyrý mamandyǵy boiynsha 3-kýrsta oqyǵan. Marqum dámhanaǵa aspaz bolyp jumysqa ornalasqanyna nebári bir ai bolǵan.
