Kentaý qalasynda jylý qazandyqtary qalypty rejimde jumys istep tur. Bul týraly óńirlik kommýnikatsiialar qyzmetinde ótken brifingte Kentaý qalasy ákiminiń orynbasary Qýanysh Ysqaqov aitty.
«Kentaý qalasyndaǵy №5 jylý energiia ortalyǵy qalypty rejimde jumys isteýde. Jylý berý temperatýralyq keste boiynsha júzege asyrylýda. Ortalyqtandyrylǵan jylýǵa qosylǵan 14 myń abonent bar. Barlyǵy tolyq jylý júiesimen qamtamasyz etilgen», - dedi Qýanysh Ǵalymjanuly.
Ákim orynbasarynyń málimdeýinshe, 2022-2023 jyldary jylytý maýsymyn sapaly jáne úzilissiz ótkizý maqsatynda oblys ákimdiginiń qoldaýymen, №5 JEO negizgi jáne qosalqy qondyrǵylaryn, №7,8,11,12 qazandyqtaryn, №3 týrbogeneratordy aǵymdaǵy jóndeýge qajetti qarjy qarastyrylǵan. Qazirgi ýaqytta aǵymdaǵy jóndeý boiynsha barlyq jumystar tolyǵymen aiaqtalǵan.
«Jylý energiia ortalyǵy tolyq jumys rejiminde qyzmetin atqarýda. Ernazarov-Tólebi kóshesi turǵyndarymen bolǵan kezdesýdegi ótinishterge sáikes, (obratka) qaita qubyryn úlkeitý máselesi boiynsha jumystar atqaryldy. Ishki rezervten ólshemi 100 mm jáne 133 mm, jalpy uzyndyǵy 300 metr qubyr tartylyp, 19 qarasha kúni iske qosyldy. Nátijesinde, Áýezov, Tólebi, Ernazarov kóshesinde jylý kórsetkishteri oń nátije berip jatyr. Qala turǵyndarynan «jylý joq» degen shaǵymdar azaidy. Jekelegen ótinishter boiynsha jylý inspektsiiasy, ishki oram júiesi, retteý tobynyń qyzmeti tiisti jumystaryn istep jatyr. Sondai-aq, turǵyndarmen túsindirme jumystary turaqty júrgizilýde», - dedi «Kentaý Servis» MKK direktory Áshirhan Tóleý.
Sonymen qatar, 2022-2023 jyldardaǵy jylý maýsymyna qajetti 90 000 tonna qatty otyn (kómir), 700 tonna suiyq otyn (mazýt) jáne 20 tonna dizelge kelisimshart túzilgen. Ol kestege sáikes jetkizilýde.
