Kentaý qalasyndaǵy Bekzat Sattarhanov atyndaǵy sport kesheninde qazaq kúresinen Túrkistan oblysynyń jastar men jasóspirimderi arasynda «Jas barys» týrniriniń jalaýy jelbiredi.
Kúres dodasyna óńirimiz boiynsha irikteýden ótken 120 balýan qatysyp, ózara sheberliktiń shyńdady. Jastar arasynda qazaq kúresinen aǵa bapker Erlan Syzdyqovtyń aitýynsha, boz kilemde top jarǵan jeńimpaz jas balýandar 14-16 jeltoqsan kúnderi Astanada ótetin respýblikalyq jarysta oblys namysyn qorǵaityn bolady.
Bolashaǵy jarqyn jasóspirimder arasynda 55 keli salmaqta synǵa túsken Roziman Togyshov pen 64 kelidegi talantty jas sportshy Nursaiat Ábdýaqas, jastar arasynda úzdik óner kórsetip kele jatqan 66 kelidegi Tólen Ádil bar. Budan ózge túrkistandyq Shaiihslam Baýyrjannan jattyqtyrýshylar mol úmit kútip otyr.
Mamandar qazir qazaq kúresin dúniejúzilik deńgeide damytý úshin igilikti ister atqarýda. Álem boiynsha ulttyq sport túri halyqaralyq deńgeide damyp barady. Túrkistan oblysynda sońǵy kezderi qazaq kúresi jastar arasynda keńinen nasihattalyp, búginde myńdaǵan aýyl jastary sportpen kásibi turǵyda ainalysady.
Oblystyq deńgeide ótken bul jarys jas balýandardyń tusaýyn kesti. Kilemde beldesken úzdik sportshy jastar aldaǵy kezde respýblikalyq jarystarǵa qatysatyn bolady. Osylaisha, qazaq kúresinen jastar quramasy jasaqtaldy.
