Túrkistan oblysynyń ákimi Darhan Satybaldy Kentaý qalasyna jumys saparymen baryp, birqatar nysandy aralady, dep habarlaidy «Ult aqparat» oblys ákimdiginiń baspasóz qyzmetine silteme jasap.
Qalany jylýmen qamtý barysymen tanysty. Qala ákimi men jaýapty basshylarǵa jylý jáne ózge de shuǵyl sheshýdi talap etetin máseleler boiynsha jumysty jalǵastyrýdy tapsyrdy.
«Turǵyndardy infraqurylymmen qamtyp, qolaily jaǵdai jasaý – mindetimiz. Kentaý Túrkistanmen birge damityn ári áleýeti zor shahar. Jylýǵa, sý júiesine qatysty túitkilder qatań baqylaýda bolady», – dedi Darhan Satybaldy.
Búginde Kentaýdaǵy Sh.Ýálihanov kóshesindegi jańadan soǵylǵan kópqabatty 10 turǵyn úi gaz júiesine qosylýda. Bul úilerdi tabiǵi gazben qamtamasyz etý maqsatynda syrtqy gaz júilerine jobalyq-smetalyq qujattamasy ázirlenip, qurylys jumystary byltyr aiaqtaldy. Qazirgi tańda Sh.Ýálihanov kóshesindegi №160, 162, 164-shi úilerdegi 180 páter tabiǵi gazben qamtamasyz etildi. Sonymen birge №178, №188 jáne ózge de úilerdi jylýmen qamtý jumystary aiaqtaýlǵa jaqyn.
Turǵyn úilerdi aralaǵan óńir basshysy «Kentaý Servis» MKK №5 jylý elektr ortalyǵynda da boldy. Qazirgi tańda ortalyqtandyrylǵan jylýǵa 14 myńǵa jýyq abonent qosylǵan. Onyń ishinde 108 biýdjettik mekeme, 2295 jeke sektorly turǵyn úi, 346 kópqabatty turǵyn úi, 441 kommertsiialyq nysanǵa jylý berilýde. Jylý ortalyǵy qajetti mazýtpen, kómirmen jáne suiyq otynmen qamtylýda. Ortalyqty jóndeýden ótkizý máselesi de nazarda tur.
Darhan Satybaldyǵa «Qosqorǵan» sý qoimasyn odan ári tolyqtyra otyryp, sý tómendetý júiesin salý jobasynyń II kezeńindegi jospary tanystyryldy. Osy arqyly sý qoimasynyń syiymdylyǵy rettelip, qaýipsizdigi nyǵaia túspek. Atalǵan jobanyń I kezeńi boiynsha jumys qolǵa alynǵan. Ol boiynsha Kentaý qalasyndaǵy «Mirǵalymsai» ken ornynda shahtalyq sýtókpe salý jáne tik drenaj uńǵymalaryn ornatý kózdelgen. Qazirgi ýaqytta 11 uńǵymanyń 10-ynda burǵylaý jumysy aiaqtalǵan.
Odan keiin oblys ákimi qalanyń káriz tazartý stantsiiasynyń jai-kúiimen tanysty. «Kentaý qalasyndaǵy káriz sý tazartý stantsiiasy men sý tazartý qurylymdarynyń qurylysy» jobasyn iske asyrý boiynsha jobanyń tehnikalyq ekonomikalyq negizdemesin kelisý jumystary júrgizilýde. Qurylys-montajdaý jumystaryn júrgizý 2023-2024 jyldarǵa josparlanǵan. Joba boiynsha 40 ga jer telimine jańa káriz sý tazartý stantsiiasy salynyp, sý tazartý qurylymdarymen qamtylady. Bul stantsiia qalanyń káriz sý júiesin tolyq tazalaýǵa qaýharly bolmaq.
Kentaýdaǵy mańyzdy jobalar men nysandardyń jaǵdaiymen tanysqan óńir basshysy infraqurylymdy jaqsartý baǵytyndaǵy jumystarǵa qoldaý jalǵasatynyn jetkizdi. Basshylarǵa sý nysandaryna qatysty jobalardy ábden zerttep baryp, sapaly atqarýdy tapsyrdy.
