Túrkistan oblysynyń ákimi Janseiit Túimebaev Kentaý qalasyna arnaiy jumys saparymen bardy. Sapary barysynda ondaǵy birqatar nysandardy aralap, atqarylyp jatqan jumystarmen tanysty.
Aldymen aimaq basshysy Oranǵai aýyldyq okrýgindegi «Ál-Bereke» aýyl sharýashylyǵy óndiristik kooperativine aialdady. 2016 jyly qurylǵan nysan kókónis jáne jemis-jidekterdi qaita óńdeý, saqtaý jáne daiyn ónimdi ótkizý sharýalaryn atqarýǵa baǵyttalǵan. Kooperativtiń jalpy jer kólemi - 300 gektardy quraidy. Onda 50 ga alma baýy, 30 ga júzim, 40 ga alhory, 40 ga abrikos, 140 ga baqsha, kókónis daqyldary egilgen. 30 adam turaqty jumyspen qamtylǵan.
Mekeme jylyna 450 myń litr jemis-jidek shyrynyn, 1500 tonna kókónis marinadyn, 1200 tonna tomat, alma, asqabaq ezbelerin daiyndaýǵa qaýqarly. Kooperativine 2018 jyldyń 11 aiynda jalpy sommasy 292 mln. teńgeni quraityn 1950 tonna taýar óndirgen. Onyń 1200 tonnasy ishki naryqqa ótkizilse, 750 tonnasy Resei Federatsiiasyna eksporttalǵan.
Qazirgi tańda atalǵan mekeme aýyl sharýashylyq daqyldaryn alý jóninde jalpy jer kólemi 350 gektar quraityn 7 aýyl sharýashylyq taýar óndirýshilerimen kelisim shart jasasqan.
Sondai-aq, aimaq basshysy «Kentaý servis» memlekettik kommýnaldyq kásipornyn aralap kórdi. Qalany jylýmen qamtamasyz etetin mekeme 2011 jyly qurylǵan. Seriktestikte 395 adam jumys isteidi. Atalǵan mekeme 334 kópqabatty turǵyn úige, 2121 jeke úige, 374 kommertsiialyq nysanǵa jáne 102 biýdjettik mekemege jylý berip keledi. Jalpy qalada 38,2 shaqyrym magistraldyq, 116,8 shaqyrym ishki oramdyq jylý qubyry tartylǵan.
Mekeme basshysy Tóleý Áshirhan Elbasynyń tapsyrmasyna sáikes, kommýnaldyq qyzmettiń quny 136-dan 103,88 teńgege nemese 23,88 paiyzǵa arzandatylǵanyn jetkizdi. Sondai-aq, tómen jalaqy alatyn 60-tan astam azamattyń eńbekaqysyn kóterý maqsatynda mekeme biýdjetinen 1 mln. 600 myń teńge qaralyp otyrǵanyn aitty.
Atqarylyp jatqan sharýalarǵa qanyqqan oblys ákimi halyqqa sapaly qyzmet kórsetý baǵytynda tiisti sharalardy der kezinde atqarýdy tapsyrdy.
