AQSh prezidenti Donald Tramp Ulttyq arhivtiń saitynda Amerikanyń 35-shi prezidenti Djon Kennedidiń ólimine qatysty 2,8 myń qupiia qujatty jariia etý týraly buiryqqa qol qoidy. Bul týraly Aq úi baspasóz qyzmeti málim etti, dep habarlaidy QazAqparat Associated Press-ke silteme jasap.
Tramp atap ótkendei, AQSh biligi kópshiliktiń tarihty ózgertken oqiǵa jaily tolyǵyraq bilýi úshin prezident Djon Kennedidiń ólimine qatysty qujattarǵa qoljetimdilikti qamtamasyz etpek.
Amerika kóshbasshysy birqatar vedomstvolardyń talaptaryna sáikes, bul taqyrypqa qatysty basqa da materialdardyń qupiia saqtalatynyn naqtylady.
«Bizdiń ulttyq qaýipsizdigimizge ziiany tiip ketpeý úshin osyndai toqtamǵa keldik», - dedi Tramp.
Atalǵan qujattar AQSh Ulttyq arhiviniń saitynda jariialana bastady jáne bul protsess bir apta boiy jalǵasady.
Aita keteiik, Djon Fitsdjerald Kennedi 1917 jyldyń 29 mamyrynda Brýklainda (AQSh, Massachýsets shtaty) dúniege kelgen. Ol 1960 jyly 43 jasynda AQSh tarihyndaǵy eń jas prezident boldy. 1963 jyldyń 22 qarashasynda Dallasqa (Tehas shtaty) jasaǵan sapary kezinde óltirilgen edi. Úkimettik komissiia prezidentke Li Harvi Osvald jalǵyz ózi qastandyq jasady degen qorytyndyǵa keldi. Alaida, resmi nusqany AQSh jurtshylyǵy qabyldamady. Sebebi sarapshylar jinaǵan derekte prezidentke ár túrli núkteden alty ret oq atqany kórsetilgen edi.
