Almatyda múmkindigi shekteýli adamdar qurǵan «ERZI» qaýymdastyǵynyń músheleri ákimdik mańyna jinalyp, qala basshylyǵynan keń ǵimarat tabýǵa kómektesýin surady, dep habarlaidy "Ult aqparat".
«Biz áleýmettik salanyń máselelerin sheshýmen ainalysamyz. «ERZI» uiymy – tirek-qimyl júiesi isten shyqqan múmkindigi shekteýli adamdardy memlekettik tapsyrys aiasynda tegin ońaltýmen ainalysatyn jalǵyz uiym. 60-qa jýyq erikti jumys jasaidy. Bizdiń uiymǵa keń ǵimarat kerek. Qazir otyrǵan bólmemizdiń keńdigi 110-115 sharshy metr ǵana. Bul bizdiń múmkindigimizdi tolyq paidalanýǵa kedergi keltiredi», - dedi ÚEU jetekshisi Erbol Igembergenov.
Onyń aitýynsha, ońaltý ortalyǵynyń keńsesi Jeltoqsan, 110 mekenjaiynda ornalasqan. Ǵimarattyń qalǵan qabattary bos tur.
Ákimdik birneshe jyldan beri sol bos bólmelerdi uiymǵa senimdi basqarýǵa beretinine ýáde berip kelgen.
«Biz óz qarjymyzǵa jylý júiesin ornattyq. Qubyrdy aýystyrdyq. Buǵan kóp qarajat jumsaldy», - dedi Erbol Igembergenov.
ÚEU ókilderimen qalalyq Áleýmettik ál-aýqat basqarmasy basshysynyń orynbasary Ainur Muqajanova kezdesti. Ol bul másele jaqyn arada sheshimin tabatynyna sendirdi.
«Biýdjettik kodekske sáikes, úkimettik emes uiymdardyń ǵimaratyna biýdjetten qarajat bólinbeidi. Biraq, qazir máseleniń sheshimin izdestirip jatyrmyz, kelissózder júrgizilýde», - dedi Ainur Muqajanova.
«ERZI» múmkindigi shekteýli adamdar qaýymdastyǵy 2015 jyly qurylǵan.
