Kemerovo qalasy ákimshiliginiń ókilderi "Zimniaia vishnia" saýda ortalyǵynda bolǵan tótenshe jaǵdaidan keiin iz-tússiz joǵalyp ketken jáne órtten keiin qaza tapqandardyń tizimin jariialady, - dep habarlaidy "Ult aqparat" Tengrinews.kz agenttigine silteme jasap.
Tizimde iz-tússiz joǵalǵan 38 adamnyń aty-jóni kórsetilgen, olardyń 26-y - balalar.
Sondai-aq, saitta aty-jóni anyqtalǵan qaza tapqan 25 adamnyń aty-jóni jariialanǵan.
Meditsinalyq kómekke 69 adam júgingen.
Biraq RIA Novosti málimetinshe, genetikalyq saraptamalardyń qorytyndysy shyqpaǵansha mundai tizimdi jariialaý múmkin emes. Bul týraly Resei Federatsiiasy Tergeý komitetiniń resmi ókili Svetlana Petrenko da aitty.
Aita keteiik, Kemerovtiń ortalyq alańynda áli de jappai miting jalǵasyp jatyr. "Kemerovte miting. 4 myńǵa jýyq adam ákimshilik ǵimarattyń mańyna jinalyp, Aman Tóleevtiń otstavkaǵa ketýin talap etip jatyr. Jinalǵandardyń ishinde "Zimniaia vishnia" saýda ortalyǵynda bolǵan órtten qaza tapqandardyń týystary", - dep jazǵan edi osyǵan deiin BAQ ókilderi.
Sondai-aq, miting kezinde Kemerov oblysynyń vitse-gýbernatory Sergei Tsivilev qaiǵyly jaǵdai úshin turǵyndardan tizerlep turyp keshirim suraǵan bolatyn.
Osyǵan deiin Kemerovtegi "Zimniaia vishnia" saýda ortalyǵynda bolǵan órtten qaza tapqandardyń 41-i balalar ekeni habarlanǵan edi. Resmi málimetterge qaraǵanda, 25 naýryzda bolǵan tótenshe jaǵdaidan barlyǵy 64 adam qaza boldy.
Resei prezidenti Vladimir Pýtin de qazirgi ýaqytta Kemerovte. Osyǵan deiin Resei prezidenti Kemerovtegi 64 adamnyń ólimine ákep soqqan "Zimniaia vishnia" saýda úiinde bolǵan órttiń neden shyqqanyna qatysty pikir bildirgen bolatyn.
"Bizde ne bolyp jatyr, bul áskeri qaqtyǵys emes, ken ornyndaǵy metannyń shyǵyp ketýi emes qoi. Adamdar demalýǵa keldi, balalar. Demografiia týraly aityp, osynsha adamdy nege joǵaltyp otyrmyz? Bul qylmystyq salǵyrttyqtan, bos belbeýlikten boldy", - degen edi Pýtin órt saldaryn joiýǵa arnalǵan Kemerovtegi jiyn barysynda.
Condai-aq, osyǵan deiin aýrýhanalarda tótenshe jaǵdaidan zardap shekken 13 adamnyń jatqany aitylǵan bolatyn. Keiinnen taǵy 50 adam meditsinalyq kómekke júgingen.
