Jeli qoldanýshylary Kemerovtegi "Zimniaia vishnia" saýda ortalyǵynda bolǵan órtten keiin paida bolǵan videony talqylap jatyr. Videoda qara tústi kiim kigen jigittiń órt bastalmai turyp batýtqa bir zat qoiyp jatqany túsirilgen, - dep jazady kaz.tengrinews.kz anews.com portalyna silteme jasap.
"Myna jigitke nazar aýdaryńyzdarshy - batýtqa jaqyndap, sómkesinen birdeńe shyǵaryp jatyr", - delingen Jelide taralyp jatqan videonyń sipattamalarynda.
Keiinirek videoǵa túsip qalǵan jigit málimdeme jasady. Onyń esimi Stanislav Sobolev ekeni belgili boldy. Er adam bul jaǵdai týraly áleýmettik jelidegi paraqshasynda jazdy.
"Jelide "Zimniaia vishnia" saýda ortalyǵynda órt bastalmai turyp, 5 minýt buryn qara sómkemen júrgen jigit túsirilgen video taralyp jatyr. Iá, videodaǵy jigit - men. Biraq men órt salýshy emespin. Men sol saýda ortalyǵynyń qyzmetkerimin, sol kúni jattyǵýǵa barý úshin sómkemen kele salǵanmyn. Batýt jaqqa dostarymmen amandasý úshin kirip shyqtym. Osy iske qatysym bar degen kúdikterińiz bolsa, maǵan jazyńyzdar, ótinemin. Órt kezinde men de áriptesterim siiaqty balalardy qutqaryp qalý úshin kómektestim", - dep jazdy Stanislav Sobolev áleýmettik jelidegi paraqshasynda.
Degenmen Jeli qoldanýshylarynyń ashýy munymen basylmady.
"Adamdar, ótinemin, osymen toqtańyzdar! Qolymnan kelgenshe kómektestim, órt salǵan joqpyn. Órt salýshy emespin!" , - dep jaýap berip jatyr jigit qaldyrylǵan pikirlerge.
Biraq jigitti qoldaǵandar da boldy. Videonyń tolyq nusqasynda jigittiń balalar ortalyǵynyń qyzmetkerlerimen amandasyp, shyǵyp ketkeni kórinedi.
Aita keteiik, Kemerovtiń ortalyq alańynda áli de jappai miting jalǵasyp jatyr. "Kemerovte miting. 4 myńǵa jýyq adam ákimshilik ǵimarattyń mańyna jinalyp, Aman Tóleevtiń otstavkaǵa ketýin talap etip jatyr. Jinalǵandardyń ishinde "Zimniaia vishnia" saýda ortalyǵynda bolǵan órtten qaza tapqandardyń týystary", - dep jazǵan edi osyǵan deiin BAQ ókilderi.
Sondai-aq, miting kezinde Kemerov oblysynyń vitse-gýbernatory Sergei Tsivilev qaiǵyly jaǵdai úshin turǵyndardan tizerlep turyp keshirim suraǵan bolatyn
Osyǵan deiin Kemerovtegi "Zimniaia vishnia" saýda ortalyǵynda bolǵan órtten qaza tapqandardyń 41-i balalar ekeni habarlanǵan edi. Resmi málimetterge qaraǵanda, 25 naýryzda bolǵan tótenshe jaǵdaidan barlyǵy 64 adam qaza boldy.
Resei prezidenti Vladimir Pýtin de qazirgi ýaqytta Kemerovte. Osyǵan deiin Resei prezidenti Kemerovtegi 64 adamnyń ólimine ákep soqqan "Zimniaia vishnia" saýda úiinde bolǵan órttiń neden shyqqanyna qatysty pikir bildirgen bolatyn.
"Bizde ne bolyp jatyr, bul áskeri qaqtyǵys emes, ken ornyndaǵy metannyń shyǵyp ketýi emes qoi. Adamdar demalýǵa keldi, balalar. Demografiia týraly aityp, osynsha adamdy nege joǵaltyp otyrmyz? Bul qylmystyq salǵyrttyqtan, bos belbeýlikten boldy", - degen edi Pýtin órt saldaryn joiýǵa arnalǵan Kemerovtegi jiyn barysynda.
Condai-aq, osyǵan deiin aýrýhanalarda tótenshe jaǵdaidan zardap shekken 13 adamnyń jatqany aitylǵan bolatyn. Keiinnen taǵy 50 adam meditsinalyq kómekke júgingen.
