Kemelbek Oishybaev "Qazaqstan" RTRK" AQ Basqarma tóraǵasy qyzmetinen ketti, - dep habarlaidy "Ult aqparat". Bul týraly ol Facebook jelisindegi paraqshasynda málimdedi.
"Qurmetti dostar! "Qazaqstan" RTRK" AQ Basqarma tóraǵasy qyzmetinen ketýdi uiǵardym. Oqý týraly iske asyrylmai qalǵan oilarym bar edi, solardy jalǵastyrsam deimin. Az ýaqyt ishinde kóp sharýa bastadyq. Meniń ketkenime qaramastan, jalǵasy bolady dep úmittenemin. Eń bastysy - jaqsy adamdarmen tanystym, kásibi mamandar, keremet orta. Korporatsiianyń bolashaǵy zor!", - dep jazdy ol.
Sonymen qatar, Oishybaev qazaq televiziiasynyń qara shańyraǵynda qyzmet etý úlken tájiribe bolǵanyn jáne áriptesteri men barlyq janashyryna alǵys aitty.
Eske salaiyq, bul qyzmetke ol ótken jyldyń qazan aiynda kelgen. Sol kezde Oishybaevty "Qazaqstan Respýblikalyq teleradiokorporatsiiasy" AQ ujymyna aqparat jáne kommýnikatsiialar ministri Dáýren Abaev tanystyrǵan bolatyn.
Oishybaev Kemelbek Baqtyǵululy 1977 jyly 13 shildede dúniege kelgen. Ál-Farabi atyndaǵy Qazaq ulttyq ýniversitetin Jýrnalistika mamandyǵy boiynsha, Qazaq Gýmanitarlyq-Zań ýniversitetin zańger mamandyǵy boiynsha, Halyqaralyq biznes akademiiasyn korporativti menedjment mamandyǵy boiynsha támamdaǵan, sonymen qatar Geneva Business School - MBA mektebin bitirgen. Ortalyq kommýnikatsiialar qyzmetiniń direktory qyzmetin atqardy. Sonymen birge "Qazmedia ortalyǵy" bas direktorynyń orynbasary, "Zaman Qazaqstan" respýblikalyq gazeti bas redaktorynyń orynbasary, "Qazaqtelekom" AQ korporativtik satylymdar direktsiiasynyń bas direktory qyzmetterin atqarǵan.
