Kemedeginiń jany bir...

Kollajdy jasaǵan Záýresh SMAǴUL, «EQ»

«Malyńdy jaýǵa,

Basyńdy daýǵa

Qor qylma, qorǵa, tatýlas!»

Abai

Dúnie tynyshsyz...

Pandemiianyń quryǵynan endi shyq­­tyq pa degen jer shary ekige qaq aiyrylyp, esi – ekeý, túsi tórteý kúi ústinde tur.

Basy qazaqtyń Uly dalasyn dir etkizgen qańtardyń qandy qyr­ǵy­ny­men bastalǵan jiyrma birinshi ǵasyr­dyń jiyrma ekinshi jyly tamyryn ǵasyrlar qoinaýynan alatyn Batys pen Shyǵystyń jańa tur­patty surapyl teketiresine jal­ǵasty. Adamzat oiy men sanasyna sal­maǵyn batpandap salǵan osynaý jú­rek túrshiger ǵalamdyq arbasýlar aimaq­tyq qaqtyǵystar alańynan shyǵyp, Eýraziianyń óri men tórin erkin kezýi, soǵys órtiniń ulǵaia túsýi, Ýkrainanyń qalalary men orman-toǵai­larynyń ajal alqabyna ainalýy adamzat balasyn alańdatyp otyr.

Túlegen sana men ózgergen qundy­lyqtar...

Alty qurlyqty álekke salyp, mil­liardtardyń júregin úreimen tum­shalaǵan qan-qyrǵynnyń shalyǵy tigen elderdiń qatary kóbeiýde... Soǵys maidany aqparat maidanyna jal­ǵasyp, sanktsiialar qyrqysynyń beti qaitar emes. Kúni keshe ekpini eldi eseń­giret­ken Eýroodaqtyń jaly qulap, «qystan qa­lai shyǵamyz?» degen ýaiym qoryǵy­na qamala bastady... AQSh Ýkrainaǵa qarý-jaraq berýin doǵarar emes. Resei shekteýli mobili­zatsiiasyn jariialady... Bas-kóz demei Ýkrainanyń tórt oblysyn ózine qosty...

Geosaiasi ahýaldardyń shamadan tys kúrdelenip, ýshyǵyp, tamyryn tereńge jibergeni, qanatyn keńge jaiǵany sonshama, saiasat deitin sylqym minezdi kári qyzdyń ashpaityn esigi, baspaityn tóri, júrmeitin jeri, shyqpaityn óri, ait­paityn sózi qalmady... Óreskeldik pen órkókirektiktiń onsan úlgisi ósek pen esep­tiń qara kórigin kún-tún úrlep baǵýda...

Urpaq sanasy arsyzdyqtyń tut­qyny bolýǵa ainalǵandai...

Adamzatqa tán ortaq ókinish – Osy!

Jer esimdi planetada turatyn jeti jarym milliard jumyrbas pende­niń taǵdyr-talaiyn oiynshyqqa ainal­dyrǵysy keletinderdiń jańa dáýiri, aitýǵa aýyz barar emes, soǵysqumarlar dáýiri bastalǵan syńaily?!.

Tumany men kúmáni qalyń dáýir!

Osyndai asa kúrdeli, aýmaly-tókpeli kezeńde el Prezidenti Qazaqstan halqyna óziniń kezekti dástúrli Joldaýyn arnaǵaly aidan asty. Ádiletti Qazaqstannyń irgesin bekitip, maqsat-muratyn anyqtap, dáiek­teý baǵytynda, ári qalyptasyp otyrǵan álemdik qiyndyqtar men qaýip-qaterlerden elimizdi aman alyp ótý úshin Joldaýda atqarylar naqty sharalar men usynystar aityldy.

Bir aidan astam ýaqyttan beri ha­lyq talqysyna túsip, jurtshylyq tara­pynan keń qoldaý tapqan tarihi qu­jat­ta el erteńin anyqtar baǵyt-baǵ­darlar belgilendi. Prezident damý­dyń jańa ke­zeńine aiaq basqan Qazaq­stan­nyń bolashaǵy halqymyzdyń óz qo­lynda ekenine basa nazar aýdardy. «Hal­qymyz jalpyulttyq referendýmda saiasi jańǵyrý baǵdaryn qoldady. Konstitýtsiialyq reforma Jańa, Ádiletti Qazaqstandy qurý jolyndaǵy asa ma­ńyzdy qadam boldy. Elimizdegi saiasi jań­ǵyrý endi ekonomikalyq ózgeristerge ulasýǵa tiis. 

Biz «Azamat-biznes-memleket» ara­syn­daǵy qatynasty túbegeili ózgerte­miz. Memleket, eń aldymen, bárine bir­dei múmkindik berip, ádildik ornata­dy... Memleket ekonomikalyq erkindikti qol­­daidy. Biraq halyqty naryq turaq­syz­dyǵynyń yqpalynan barynsha qor­ǵaidy. Shaǵyn jáne orta biznesti meii­linshe ­damytady...» dei otyryp, ol osy baǵyt­ta júrgiziler reformalardyń naq­ty bes baǵdaryn usyndy.

Olar mynalar:

Birinshi: Jańa ekonomikalyq saiasat.

Ekinshi: Naqty sektorlardy damytý.

Úshinshi: El bolashaǵyna arnalǵan strategiialyq investitsiia.

Tórtinshi: Memlekettik basqarý isin qaita jańǵyrtý.

Besinshi: Zań jáne tártip.

Qasym-Jomart Toqaev usynyp otyr­ǵan ár baǵdar tórkininde, saiyp kelgen­­de, el ómiri men taǵdyryn oń jolǵa salý­dyń, halyq oiyn mazalaǵan áleýmettik, turmystyq qiyndyqtar men saiasatta ketken aqaýlyqtardy, teńsizdikter men júgensizdikterdi sheshýdiń joldary men jospary tur. Prezident osyǵan deiingi álemdik tájiribede óz ómirsheńdigin dá­leldegen, júieli túrde júrgizilip, onsan elder­diń áleýetin kúsheitken, áleýmettik qiyn­dyqtardy sheshýge múm­kindik bergen ómir súrý men turmys-tir­shilikti ońai­latýdyń oń úlgilerin eskere otyryp, Qazaqstandy qalyptasqan kúrdeli, tarihi ahýaldar qoryǵynan alyp shyǵýdyń saiasi-ekonomikalyq joldaryn usynyp otyr. Ótkenniń ashy sabaqtaryn eskerý – el ­damýyna yqpal eter birden-bir ómirlik faktor ekenin umytpaýymyz kerek.

Óitkeni...

Ol jady – máńgilik ainasy.

Halyq óz basynan ótken tarihtyń taǵdyrly syn saǵattaryn esinen shyǵar­maidy. Jaqsysyn da, jamanyn da, aýyryn da, jeńilin de umytpaidy. Ár urpaq ózi ómir súrip, ózegin órtegen ómir, aqiqaty men ýaqyt shyndyǵyn kókireginde tumardai túiip, keiingige jetkizedi. Bizdiń urpaq búgingi eki ǵasyr toǵysynda ǵumyr keship, ultty saqtaý men qorǵaýdyń uly mindeti iyǵyna túsken, el bolyp qalýdyń aýyr syndaryn ótkerip jatqan urpaq!

Biz – Táýelsizdiktiń qadiri men qasie­tin biletin urpaqpyz!

Táýelsizdik arqaýy – halyq.

Halqynyń taǵdyr-talaiyn mansap pen bailyqqa jetýdiń kópiri etýden asqan qaýipti nárse joq. Jahandaný dáýiri keńester odaǵynyń ornynda paida bolǵan táýelsiz elderge osy psihologiiany kúndiz-túni tyqpalaýmen keledi... Bul – bir ulttyń ekinshi bir ultty qarýdyń kúshimen baǵyndyrýdan da qaýipti, ekspansiianyń ailaly, qaterli úlgisi! «Myltyqsyz maidan» ashqandardyń kishi ulttardyń aqyly men sanasyn, jany men júregin jaýlaýdyń joly! «Jahandaný zamanynda aidai álem alaqandaǵydai bolyp qalǵan» (Qasym-Jomart Toqaev) jiyrma birinshi ǵasyrda ultty, ulttyq qundylyqtardy «kózdiń qarashyǵyndai» saqtaýdyń asa qajet ekenin Memleket basshysy jańa ǵasyr órindegi Abai murasy men iliminiń máni men maǵynasy týraly jazǵan maqalasynda barynsha taratyp, tereń ashqan. Prezidenttiń ulttyq sana men oidy «pyshaqtyń júzimen alyp ótkendei» alyp ótip, tildi óristetý, dildi saqtaý, Batys pen Shyǵystyń óliara tusynda jaiǵasqan Uly Dalanyń ótkeni – búgini – bolashaǵy jaily tolǵaýlary – urpaq sanasyn tárbieleýdiń ustyny taza ustanymdar ekeni shúbásiz.

Biz tańǵy aqparat keshke jetkenshe «qartaiyńqyrap» qalatyn qadamy, oiy júirik, jedel zamanda ómir súrip otyrmyz.

Oi, sóz, is deitin úsh uǵymnyń bir­tutas birligin birinen-birin ajyratpai teń ustaǵan jaǵdaida ǵana jeńis týy qolymyzda jelbiremek. Keshegi sózińiz ben búgingi oiyńyz erteń atqa­rylar isińizben sabaqtasyp jatýǵa tiis. Bul saiasattaǵy mádeniet pen taban­dy­lyqtyń aiqyn kórinisi! Qasym-Jomart Kemelulynyń arǵy-bergi qoǵam, zaman shyndyqtaryn jasyryp-búkpei, el tarihyna «qańtar­dyń qasireti» bolyp engen qandy qyrǵyn­nyń kezinde qiyndyqpen qalai betpe-bet turysqany, ótkenniń «aǵyn aq, qarasyn qara» dep jańylmai, jazǵyrmai baǵala­ǵany el jadynda. «Týra bide týǵan joq, týǵandy bide iman joq» deitin qazaqtyń tóbe bii – Tóle babamyzdyń sózi osyn­dai­da eriksiz eske túsedi.

Iá...

Ýaqyt – synshy...

Ýaqyt – emshi...

Ýaqyt – el ómiri men qoǵam ómirin tarazy talqyǵa sala otyryp, ár tulǵanyń, árbir adamnyń sózi men isine túbi adal, ádil baǵasyn beretin qatal, qatygez tóreshi!

El Prezidentiniń Joldaýyn oqyp otyryp, dápter betine sol kúnderde túsken tómendegi jazbalaryma qaiyra kóz júgirttim. Kúiingen tusym da, qai­ǵyrǵan kezim de, júregim atsha týlap, bozdaǵan sát-saǵattarym da, qysqasy, bári-bári bolǵan eken...

«Qadirli Qasym-Jomart Kemeluly! Siz el basyna syn túskende Ózińizge tán sabyr men ustamdylyqtyń tabandy úlgisin tanyttyńyz. Búgingi halyqqa qaratyp aitqan eki sózińizdiń ekeýi de estir qulaqqa jeterdei qanatty sóz boldy. Týǵan eliniń taǵdyryn oilaǵan naǵyz el basshysynyń sózi! Tarihi sóz! Halyqtyń Sizden kútkeni de osyndai baǵyty durys, baǵdarly sóz edi! Dál osy sát-saǵattarda týǵan halqyńyz ǵana emes, Sizdiń bul sheshimińizdi adamzat álemi aqylǵa salyp, oń qabyldaǵany kúmánsiz. «Jaýdy aiaǵan jaraly» deidi bizdiń halyq! Dál qazir el birligi men amandyǵyn qamtamasyz etýden artyq maqsat joq! Táýelsiz memleketimizdi aman saqtap qalý úshin Siz qandai sheshimge barsańyz da halyq túsinedi degen senimdemiz! Qaýyrt qimyl kerek! Alla jar bolsyn! «Kemedeginiń jany bir» degen... Búgingi kún men búgingi tún el taǵdyryn uly synǵa salyp otyr. Qazaq eliniń saǵy synbasyn! Baǵy súrinbesin! Alla sáttilik bersin! Nurlan Orazalin. 05 qańtar, 2022 jyl. 21 saǵat 37 minýt» degen sózderdi asyǵys vatsap arqyly sol kezdegi Prezident Ákimshiliginiń basshysy Erlan Qoshanovqa jiberippin. Ertesi inimizden «Hatyńyzdy Prezidentke jetkizdim» degen habar aldym.

Shynyn aitý kerek, aqparattyq bailanys úzilip, alty qurlyq Alash jurtynda bolyp jatqan qaterli qan-qyrǵyn oqiǵa­ny «Habar-24», «Rossiia-24», Euronews «RBK», «Habar» sekildi sanaýly arna ar­qyly ǵana qalt jibermei qadaǵalap otyrǵan asa qiyn da kúrdeli kúnderde, men sekildi jan-júrekteri kúizelip, Qazaq eliniń tileýin tilep, Jaratqanǵa jalbarynyp, kúńirengenderdiń esebin eshkim bilmeidi... Óitkeni olar kóp boldy... Óte kóp!

«Jańylǵandy jazǵyrý – ońai. Adas­qandy aiyrý, oń jolǵa salý, jónge sha­qyrý – qiyn! Janǵa batqany – jańylǵan da qazaq! Jańyldyrǵan da – qazaq! Jy­lat­qan da – qazaq! Jylaǵan da – qazaq! Ólgen de – qazaq! Óltirgen de – qazaq! Ókinishti!.. Oilasań, sana muzdap, júrek syzdaidy... Órt qushaǵynda qalǵan Alma­tynyń ásem ǵimarattaryn kórip, qa­byr­ǵań qaiysady... Osydan tup-týra 30 jyl buryn qalyń el Táýelsizdik aldyq dep, bórkin aspanǵa atyp jatqanda dúnie esigin ashqan besiktegi qyzylshaqa bala osydan tup-týra 30 jyl 20 kún buryn júz myńdai qaraly jurt qar aralas jańbyr jaýǵan jeltoqsannyń 16-sy kúni Táýelsizdik jariialanǵan qasietti tórde – Respýblika alańynda oiyna kelgenin istep jatyr... Atylǵan oq, órt shomylǵan ǵimarattar... Keshegi jiyrmasynshy ǵasyrdyń kózindei bolǵan, sán-saltanaty jarasqan shahar tórindegi qala ákimshiligi men Prezident Rezidentsiiasynyń qyzyl jalyn órtine oranǵan videosyn kórgende ne isterimdi bilmei qinaldym... Táýelsiz eldiń taǵdyry ustara júzinde turǵanyn janymmen, júregimmen sezindim. «E, Alla, kedeishilik pen joqshylyq aidap, adasqan ulǵa aqyl bere gór! Adas­tyr­ǵandardyń aiybyn tart­qyza kór! Eldigimizdi saqtai kór!» degen jazbalar túsipti kúndelik betine. 

Sodan beri... Toǵyz aiǵa tarta ýaqyt ótti.

El esin jidy, eńsesin kóterdi. Ult tarihyna «Qańtar qasireti» bolyp engen sol bir qaraly kúnder bizden alystaǵanymen, taqsyretti, taǵdyrsheshti sát-saǵattardyń taby sanadan keter emes, jadydan shyǵar emes...

Búgin de, mine, Prezident Toqaevtyń ha­lyqqa arnaǵan joldaýyn kemel memlekettiń irgesin bekitip, ádiletti  Qazaqstan qurýǵa bet alǵan eldiń bola­shaǵyn anyqtar baǵdarly Joldaýyn oqyp otyryp, sol kúnderdi esime aldym... Qańtardan bergi toǵyz ai kúlli jer beti turǵyndarynyń shaqshadai basyn sharadai etip, adamzat balasyn buryn-sońdy bola qoimaǵan surapyl kolliziialar qoryǵyna aidap tyqty... El basqarý men saiasi ómirdiń bilim-biligin igerip, úlken mektebinen ótken, dáýir tolqynynda júrip, qabyrǵasy qataiyp, oiy shyńdalǵan, kózqarasy bekigen, halyqaralyq qatynas­tar men diplomatiianyń qyr-syryn tolyq meńgergen, jaratylysynan halyqshyl, qoǵamshyl, memleketshil Qazaqstan bas­shysy qysqa ýaqyt ishinde álemdik saiasattyń qubylǵan qursaýyna tústi. Bir syn­nan shyǵyp, ekinshi bir synnyń emtihanynan ótti. Sózinen súrinbedi. Oiynan jańylmady... Saiasi tulǵanyń sabyrly minezi men salmaqty kózqarasy qalyń eldiń senimin bekite tústi. Qazaqstan Prezidentiniń irgeli maqsat jolynda qiyndyq ataýlydan yqpaityn saiasatkerlik ustanymyna eldiń de, álemniń de kózi jete tústi. El tizginin ustaǵan kúnnen bastap «halyq sózine qulaq asatyn memleket» qurý isin qolǵa alǵan saiasatker Q.Toqaevtyń tabandy beinesi osy qysqa ýaqyt ishinde qalyptasty.  Neni aitsa da, neni istese de aspai-saspai, alyp-ushpai, júieli túrde atqarýǵa daǵdylanǵan Memleket basshysynyń portreti, jurt sanasynda bekidi. Joldaýdyń kirispesinde aityl­ǵandai áýeli, jalpyulttyq referendýmda memlekettiń saiasi jańǵyrý baǵ­daryn anyqtaǵan ol – ulttyń áleý­met­tik ómirindegi aqaýlyqtardyń astary saiasattaǵy boikúiez samarqaýlyq pen el ishin indete jaýlaǵan korrýptsiiada jat­qanyn ashyp aitty. Qoǵamdaǵy teń­sizdiktiń aqyry «áleýmettik ashý men ashynýǵa» qalai alyp kelgenine halyq nazaryn burdy. «Memleket igiliginiń 50 paiyzy 162 adamnyń qolynda tur­ǵandyǵy» týraly sózi men ofshorlarda jasyrynǵan qisapsyz qarajatty elge qaitarý haqyndaǵy úkimetke bergen naqty tapsyrmalary halyq kóńilinen shyqty...

Ádil sóz! Adal uǵym!

Saiasat arenasynan aýlaqtańqy­rap  ketken osy bir kieli sóz ben qasietti uǵymnyń qadirin ketirgen ýaqytqa ren­jirińdi, álde aqsha men altynǵa satyl­ǵan arzanqol saiasatshylarǵa ren­jirińdi bilmeisiń?!. Kóringen kók atty­nyń qorjynyna bai­lanǵan toptar men alpaýyt elderdiń «jobasyna» ainalǵan «tulǵasymaqtardyń» aiqai-súreńi bel alǵan zaman?! «Qara qyl­dy qaq jaryp aitqan» ádil biler «kózden bulbul bop ushqan» dáýirge ne dersiń?! Janǵa batady... Ásirese zamana úrdisi qalyptastyrǵan búgingi jeli betin kezip júrgen «bet tyrnaǵysh», «shańqyldaǵysh», «japtym jala, jaqtym kúiege» negizdelgen aiqaishyldardyń qatary esepsiz kóbeiip  bara jatqanyna qynjylasyń... Taǵdyry talaýǵa túsip, ókinishke qarai, úshinshi elder qatarynan uzap shyǵa almai júrgen Alash jurtynyń áleýmettik jeli jetegine essiz bailanýy bizdi qatty oilantady. Qazaqstan Prezidentiniń: «Álem jyldam ózgerip jatyr. Biraq kóbine jaqsy jaǵyna emes...» dep, osy jylǵy maýsym aiynda ótken Peterbor forýmyndaǵy sózi eriksiz eske túsedi.

Bul sózdiń astarynda sóz ben oidyń qadiri júdeńkiregen jiyrma birinshi ǵasyrdyń rýhani keskini jatqany aidan anyq... Tarihi shyndyq pen saiasi baǵa týra berilip, ári saýatty, ári ádil aitylǵan sát-saǵat qaz-qalpy jadymyz­da. Ásirese el Prezidentiniń Birikken Ult­tar Uiymynyń jarǵylyq qaishy­lyq­tary men uiymnyń qaýqarsyz­dy­ǵy týraly aitqan syny álem jurty­nyń oiynan shyqty... Qit etse, Qazaqstan­ǵa «soqtyǵýdy» kásip kóretin qaisybir Resei saiasatkerleri men jýrnaliste­rine de sol joly Qasym-Jomart Kemel­uly ashyq, aiqyn jaýap bere otyryp, álem­niń aldynda turǵan eń basty kúreta­myr saýaldardyń biri – DNR men LNR týraly oiyn búkpesiz taratyp, úzildi-kesildi kesip aitqany esimizde. Sol kúni Qazaq Prezidentiniń saiasi, tulǵalyq jaratylysy men ustanymyn aidai álem tanydy! Sol brifingten soń alty qurlyqtyń saiasatkerleri men basshylarynyń nazary birden Qazaqstan Prezidentine buryldy. Tulǵa tuǵyry biiktei tústi.

Iá...

Bul – el tizginin ustaǵan  tulǵamen qosa,  ýaqyt kóldeneń tartqan qiyndyqtardy igerýge bet alǵan Qazaq eliniń de biigi edi...

El damýyn álemdik órkeniettiń da­mýymen úilestire otyryp, jańa dáýir qa­lyp­­tastyrǵan demokratiialyq qundy­lyq­tardy Uly dala jurtynyń minez-qul­qyna sai óristetý,  el taǵdyryn óz taǵ­­dyry sanaityn otanshyl, halyqshyl, qoǵam­shyl tulǵalardy barynsha memleket isine tartý, ǵalamdyq tehnologiiany urshyq­tai iirgen bilimdi, minezdi jastardy tár­bieleý sekildi izgi qasietterge keń jol ashý – Memleket basshysynyń qazir­gi tań­daǵy basty saiasi, adami, tulǵa­lyq usta­nymy! Bul aitqandarymyzdy túbe­geili ózgeristerge túsken Ata Zańy­myz­dan da, sońǵy Joldaýdan da, Birik­ken Ult­tar Uiymynyń kezekti sessiiasy men ShYU-daǵy sóilegen sózderinen de anyq ańǵaramyz.

El búgini men erteńin qamtamasyz  eter damý men óristeýdiń bul aitýly printsipteri men ustanymdary memleket ómiriniń uzaq merzimin qamtityny sózsiz. Qasym-Jomart Toqaev ár sózi men ár baby quqyqtyq súz­giden ótken, saiasi, ekonomikalyq qazyq-baýy berik reformalardy júzege asyrý úshin ýaqyt qajet ekenin ashyp aitty. Ol: «Qazir­gi geosaiasi jaǵdaida biz memleketimizdi bir­tin­dep nyǵaityp, reformalar men jańarý baǵdaryn nyq ustanýymyz qajet! Baryn­­sha muqiiat áreket jasap, elimizdiń uzaq mer­zim­di múddesine sai jumys júrgizýimiz kerek! Reformalardyń qazirgi qarqynyn saqtaý, saiasi máselelerdiń bárin keiinge qaldyr­mai sheshý asa mańyzdy» dei kelip, kezekten ­tys prezident sailaýyn ótkizýdi usyndy. ­Pre­zident mandatynyń uzaqty­ǵyn 7 jyl­men shektep, qaita sailanýǵa tyiym salý normalaryn jalpyhalyq­tyq tal­qyǵa saldy. Qos palatadan qoldaý ­tap­­qan konstitýtsiialyq ózgeristi óz Jar­­ly­ǵymen bekitti. Sailaý merzimin biyl­ǵy 20 qarashaǵa belgiledi. Óziniń sailaýǵa túsetinin málimdedi.

Sonymen...

«Endigi jeti jyl ishinde el tizginin kim ustaidy? Qalai ustaidy?» degen saýaldar Uly dalanyń endik-boilyǵyn ersili-qarsyly keze bastady. Bul zańdy. Demokratiialyq el basqarý úlgisin «Kúshti Prezident – yqpaldy Parlament – esep beretin Úkimet» deitin qurylymǵa negizdegen Jańa Qazaqstanda saiasi bilikti anyqtaýdyń alamany bastaldy.

Qazaqta el men erdiń oiy men sózi, isi men áreketi, maqsaty men mindeti synǵa túskende til ushyna oralar Táýekel deitin bir kieli sóz bar. «Táýekel deitin jel qaiyq. Minesiń! Minesiń de ótesiń... Muratyńa jetesiń!» deidi sol maǵynasy men máni tereń uǵymǵa bizdiń ondaǵan ǵasyrdy úkilep ustap, úrgen jelge tigizbei, úmit pen senimniń shyraǵyn sóndirmei alyp kele jatqan Alash oily adal jurtymyz.

Búgin de, mine, Alash muratynyń úmiti men senimin, oiy men mindetin arqalaǵan Qazaq eli óziniń erteńine  alyp barar jańa, taǵdyrly joldy taǵy da Táýekel deitin sol alyp kemeniń jelkenine tapsyryp otyr.

Alty qurlyq alasapyran...

Adamzat alańdaýly...

Toǵyz valdy daýyldyń ókirgen úni qulaǵymyzǵa jetip tur...

«Kemedeginiń jany bir...» degen eskiden qalǵan esti sóz eske túsedi. «Syrtyńdy – jaýǵa, ishińdi daýǵa aldyrma!» degen babalarymyz. Eldik týyn kóterip, eline jol usynyp, Ádiletti Qazaqstannyń kóshin bastaǵan Tulǵa ainalasyna shoǵyrlanar, Táýekel aityp toptasar kezdiń kelgenin oi-sanamyzben, jan-júregimizben seziner kezeńniń qyr astynda turǵanyn umytpaýymyz kerek!

Nurlan ORAZALIN,

aqyn, Memlekettik syilyqtyń laýreaty