QR Premer-Ministri Álihan Smaiylov kóshi-qon máseleleri jóninde keńes ótkizdi, onda Resei Federatsiiasynan kelýshiler sanynyń artýyna qatysty qalyptasyp otyrǵan ahýal talqylandy, dep habarlaidy "Ult aqparat" Úkimet basshysynyń baspasóz qyzmetine silteme jasap.
Kelgen adamdardy óńirler boiynsha ornalastyrý, jumysqa turý yqtimaldyǵyn qarastyrý jáne keńes berý máseleleri boiynsha eńbek jáne halyqty áleýmettik qorǵaý ministri Tamara Dúisenova, migranttardy tirkeý jáne quqyqtyq tártipti qamtamasyz etý máseleleri boiynsha ishki ister ministri Marat Ahmetjanov, jalǵa beriletin turǵyn úi naryǵynyń quqyqtyq aspektileri boiynsha ádilet ministri Qanat Mýsin sóz sóiledi.
Talqylaýǵa ǵylym jáne joǵary bilim ministri Saiasat Nurbek, tsifrlyq damý, innovatsiialar jáne aeroǵarysh ónerkásibi ministri Baǵdat Mýsin, Batys Qazaqstan oblysynyń ákimi Ǵali Esqaliev jáne Almaty qalasynyń ákimi Erbolat Dosaev qatysty.
Premer-Ministr óńirlerde áleýmettik shieleniske jol bermeý úshin ortalyq jáne jergilikti memlekettik organdardyń is-qimylyn úilestirýdi kúsheitý qajettigin atap ótti.
«Eldegi quqyqtyq tártip pen qaýipsizdikti qamtamasyz etý jónindegi jumysty kúsheitý, sondai-aq kelip jatqan reseilikterge járdem kórsetý kerek: EAEO zańnamasyna sáikes olardy ýaqytyly tirkep, eńbekpen qamtý máselelerin qarastyrý qajet. Bul oraida jalǵa beriletin turǵyn úi naryǵyndaǵy ahýaldy turaqtandyrý boiynsha sharalar qabyldaý mańyzdy», — dedi Álihan Smaiylov.
Onyń aitýynsha, barlyq memlekettik qurylymdar óz quzyreti aiasynda otandastarymyzǵa da, migranttarǵa da taraptardyń quqyqtary men jaýapkershiligine bailanysty túsindirý jumystaryn júrgizýi qajet. Aldaǵy kúnderi bul maqsatta jedel jeliler ashylady.
Sonymen qatar Premer-Ministr ýaqytsha kelgen shetel azamattaryn jumysqa ornalastyrý kezinde eńbek zańnamasynyń saqtalýyna baqylaýdy kúsheitýdi tapsyrdy.
Oǵan qosa, Premer-Ministr barlyq kólik infraqurylymynyń turaqty jumys isteýin qamtamasyz etýdi, elge kelip jatqan adamdardyń bir jerde shoǵyrlanýyn boldyrmaý jóninde qajetti sharalar qabyldaýdy, HQKO-lardyń úzdiksiz jumys isteýi úshin qosymsha qyzmet kórsetý terezelerin ashýdy tapsyrdy.
