"Astana" halyqaralyq qarjy ortalyǵynyń basqarýshysy Qairat Kelimbetov basqarýshy personaldyń jalaqysy qansha ekenin aitty, dep habarlaidy Sputnik Qazaqstan.
"Birden aitaiyn, bizde bonýs joq. Jalaqy - "Báiterek" holdingi deńgeiinde. Basqarýshy personal, "Báiterekte", meniń oiymsha, orta eseppen 5 myń dollarǵa jýyq (shamamen 1 million 900 myń teńge) alady", - dedi Kelimbetov Májilis kýlýarynda.
Sondai-aq, jańa jyl qarsańynda qazaqstandyqtarǵa aqshany saqtaýǵa qatysty keńes berdi.
"Halyqaralyq qarjy ortalyǵynda istegendikten, birjanyń qundy qaǵazdaryna investitsiia quiyp, QazMunaiGazdyń IRO-syna daiyndalyp, birja jańalyqtarynan habardar júrýge keńes beremin", - dedi ortalyq basqarýshysy.
Búgin májiliste "Astana" halyqaralyq qarjy ortalyǵy týraly konstitýtsiialyq zańǵa ózgerister men tolyqtyrýlar engizý týraly" konstitýtsiialyq zań jobasy qaraldy.
Zań jobasy "investitsiialyq rezident" uǵymyn jáne Qazaqstanda "investitsiialyq salyq rezidenttigi" baǵdarlamasyn engizýdi kózdeidi.
Investitsiialyq salyq rezidenttigi baǵdarlamasy - qazirgi tańda dúnie júzinde barynsha keńinen taralǵan qubylys. Qazaqstanda "Astana" HQO bazasynda investitsiialyq salyq rezidenttigi baǵdarlamasyn qoldaný usynylady. Baǵdarlama maqsaty – investor men onyń otbasy múshelerine Qazaqstanǵa kóp márte kirý vizasyn berý arqyly investitsiia tartý.
"Birinshi kezeńde qarjy ortalyǵynyń ákimshiligi qarajattyń zańdy-zańsyz jolmen tabylǵanyn tekseredi. Osydan keiin ákimshilik ishki ister ministrligine tiisti qoldaýhat joldaidy. Ministrlik tiisti hattama, protsedýralarmen bes jyldyq vizany berý múmkindigin tekseredi. Viza ishki ister ministrligi men ulttyq qaýipsizdik komiteti Qazaqstan zańnamasyna sákes tolyq tekseris júrgizgennen keiin ǵana beriledi. Investorǵa qoiylatyn shart – jyl saiyn HQO birjasynyń qundy qaǵazdaryna 60 myń dollar investitsiialaýy tiis", - dedi zań jobasyn túsindirgen Kelimbetov jýrnalisterge bergen suqbatynda.
Osydan keiin investitsiialyq rezidentke bes jylǵa deiingi merzimge kirý vizasy beriledi.
Ári qarai, investor elde turyp jatqanyna 90 kún ótkennen keiin jáne biýdjetke jyl saiynǵy mindetti tólemdi (7000 ailyq esep kórsetkish – 2019 jyly 17,7 million teńge) tólegennen keiin, Qazaqstannan tys jerlerdegi kózderden paida bolǵan kirister boiynsha jeke tabys salyǵyn tóleýden bosatylady.
Al Qazaqstan ishinde alynǵan kiristerge, salyq kodeksine sáikes, salyq salynady. Sheteldegi kiristerge salyq salynbaidy.
