Kelesi aptadan bastap mektepterdiń bári dástúrli rejimde jumys isteidi. Bul týraly QR Premer-Ministriniń orynbasary Eraly Toǵjanov Úkimettiń keńeitilgen otyrysynda málim etti, dep habarlaidy QazAqparat.
«Ózińizge belgili, omikronǵa bailanysty epidemiologiialyq ahýal kúrt nasharlaǵan bolatyn. Qazir jaǵdai baqylaýda dep aitsam, artyq emes. Táýligine 16 myńnan 2000-ǵa deiin azaiyp otyr. Sondyqtan munyń bári - jalpy jaǵdaidyń durystalyp kele jatqanynyń naqty kórinisi dep aitýǵa bolady», - degen vitse-premer bizneske jaǵdai jasaý úshin shekteýler tártibi ózgertilip jatqanyn eske saldy.
«Osyǵan bailanysty 24 qańtarda ózińizdiń bizneske jaǵdai jasaý týraly tapsyrmańyzǵa bailanysty olarǵa jol ashý úshin negizgi karantin sharalary alynyp tastaldy. Sonymen qatar keshe ǵana qazaqstandyq jáne sheteldik azamattardyń elge kirip-shyǵýyn jeńildetý úshin naqty sharalar qabyldandy. Kelesi dúisenbi, 14 aqpannan bastap barlyq mektepterde oqýdy offlain rejimge aýystyrýdy josparlap otyrmyz», - dedi Toǵjanov.
