Túrkistan oblysy, Keles aýdanynda «Diplommen aýylǵa» jobasy boiynsha biyl 70 maman turǵyn úi satyp alý úshin biýdjettik nesie aldy. Sonymen qatar, atalǵan baǵdarlama aiasynda kóterme járdemaqy 59 azamatqa taǵaiyndalǵan. Bul týraly Túrkistan oblysynyń Óńirlik kommýnikatsiialar qyzmeti habarlady.
«Aýyldyq aýmaqtardy damytý boiynsha jańa sharalar qabyldaý ári olardy úilestirý maqsatynda «Diplommen aýylǵa» baǵdarlamasy aýdanymyzda keńinen júzege asyrylyp, kóptegen jas mamandar baspanamen qamtylýda. Densaýlyq saqtaý, bilim berý, áleýmettik qamsyzdandyrý, mádeniet jáne sport salasyndaǵy maman aýyldyq eldimekenge jumysqa ornalasqan jaǵdaida «Diplommen aýylǵa» jobasy aiasynda bir rettik kóterme járdemaqy jáne qajettiligine qarai turǵyn úi salý nemese satyp alý úshin 1500 ailyq eseptik kórsetkishten aspaityn somada 0,01% jyldyq syiaqy mólsherimen 15 jylǵa deiingi merzimge biýdjettik nesie túrinde áleýmettik qoldaý sharalaryn alý múmkindigi bar», - dedi aýdandyq ekonomika jáne qarjy bóliminiń basshysy Azamat Muratov.
Aita keteiik, áleýmettik qoldaý sharalary usynylǵan maman aýyldyq eldimekende keminde úsh jyl jumys isteýge mindetteme alady.
Baǵdarlamanyń basty sharty – maman jumys ornynda 3 jyl kóleminde úzdiksiz jumys atqarýy kerek. Atalǵan baǵdarlamaǵa qatysqysy kelgen jas mamandar Qazaqstan Respýblikasynyń Elektrondyq úkimeti – egov.kz platformasy arqyly ótinim bere alady.
