Túrkistan oblysy, Qazyǵurt aýdanyndaǵy «Babalar rýhyna taǵzym» kesheninde qazaqtyń úsh biiniń eńseli eskertkishi ashyldy.
Sharaphana aýylynda ótken saltanatty sharaǵa oblys ákimi Ómirzaq Shókeev pen QR Memlekettik syilyǵynyń igeri Asanáli Áshimov, QR Parlamenti Májilisiniń depýtaty Saýytbek Ábdirahmanov pen memleket jáne qoǵam qairatkeri Qýanysh Aitahanov syndy azamattar qatysty. Eńseli eskertkish memleket qairatkeri, «Jeti jarǵy» jáne «Qojabergen jyraý» qorynyń tóraǵasy Beket Turǵaraevtyń bastamasymen jáne «Túgeibolat baba» qorynyń esebinen ornatyldy. Uly dala danalarynyń biri - Áiteke bi Báibekulynyń 375 jyldyq merei toiyna orai ulttyń uly bileri Tóle, Qazybek jáne Áiteke bige ornatylǵan tas músinderdiń ashylý saltanatynda aimaq basshysy quttyqtaý sóz sóilep, aitýly sharanyń mańyzyna toqtalyp ótti.
«Búgingi ótkizilip jatqan sharanyń mańyzy orasan zor. Óitkeni, tarih qoinaýyndaǵy ataqty bilerdiń esimin qaita jańǵyrtyp, ónegeli ómirin óskeleń urpaqqa úlgi etýdiń ózi úlken tárbie ekenin umytpaýymyz kerek. Qazaqstan Respýblikasynyń Tuńǵysh Prezidenti, Elbasy Nursultan Nazarbaevtyń el táýelsizdigin nyǵaitý jolyndaǵy qajyrly eńbegi - «Bolashaqqa baǵdar: rýhani jańǵyrý», «Uly dalanyń jeti qyry» atty maqalalary qazaqstandyqtar arasynda zor serpilis týǵyzyp, aýqymdy jumystardyń júrgizilýine jol ashty. Mádeniet, bilim, óner salalarynda buryn-sońdy bolmaǵan bastamalar júzege asty. Qazaq halqynyń birligin nyǵaitýǵa zor úles qosqan ataqty úsh bidi bir-birinen bólip qaraýǵa bolmaidy. Olardyń basty maqsaty - el táýelsizdigine qol jetkizý, qazaq halqynyń yntymaǵy men birligin nyǵaitý edi. «Babalar rýhyna taǵzym» kesheni toǵyz joldyń toǵysynda ornalasqandyqtan, bul nysandar osynda kelýshi týristerdiń de nazaryn aýdaratynyna senimdimin»,- dedi Ómirzaq Shókeev.
Shamamen 100 mln. teńgege turǵyzylǵan eskertkishter Qazyǵurt aýdany arqyly ótetin Shymkent - Tashkent halyqaralyq kúre jolynyń boiynda, «Babalar rýhyna taǵzym» kesheninde boi kóterdi. Osyǵan orai uiymdastyrylǵan sharada qazaqtyń betke ustar el aǵalary men ziialy qaýym ókilderi úsh bidiń tarihymyzdaǵy alar orny erekshe ekenin atap ótti.
«Úsh bidiń eskertkishin saiabaqtyń qaq ortasyna, kúnshyǵysqa qaratyp ornattyq. Shymkent-Tashkent jolynyń boiynda alystan menmundalap turady. Eskertkishtiń mańdaiyna «Uly dala danalary», «Ulttyń uly bileri» dep jazyp qoidyq. Árine, qazaqta biler kóp bolǵan. Biraq osy úsh bidi búkil qazaq moiyndaǵan. Bul ornatylǵan eskerkish eldigimiz ben birligimizdi aiqyndap turady dep senemin»,- deidi memleket qairatkeri, «Jeti jarǵy» jáne «Qojabergen jyraý» qorynyń tóraǵasy Beket Turǵaraev. Jiyn sońy respýblikaǵa eńbegi sińgen tanymal ánshilerdiń kontserttik baǵdarlamasymen jáne ulttyq sport oiyndarymen jalǵasty. Uly bilerge arnap quran baǵyshtalyp, as berildi.
