Parlament Májilisiniń jalpy otyrysynda depýtat Qazybek Isa elimizde Demografiia jáne kóshi-qon jónindegi agenttikti qurýdy usyndy, dep habarlaidy "Ult aqparat".
«Biyl Táýelsizdik alǵanyna 30 jyl tolatyn Qazaqstan úshin halyq sanynyń kóbeiýiniń mańyzy zor. Al basty qaýipterdiń biri de osy halyq sanynyń azaiýynan týyndaidy. QR Prezidenti Q.Toqaev «Táýelsizdik bárinen qymbat» atty baǵdarlamalyq maqalasynda: «Sońǵy jyldarda túrli sebepterge bailanysty báseńdep qalǵan qandastar kóshin barynsha qoldap, olardy soltústik jáne shyǵys óńirlerge ornalastyrýdy jandandyramyz» dep atap ótken bolatyn.
Keibir sarapshylardyń málimetinshe, shet elderde 7 mln-ǵa jýyq qazaq turady. Olardyń aldaǵy ýaqytta assimiliatsiiaǵa ushyraý qaýipi óte joǵary. Demografiialyq aspektide qazaq ulty úshin bul úlken áleýet bolyp tabylady. Qazir Qazaqstanǵa qonys aýdarýǵa yntaly sheteldik qazaqtardyń sany 1,5 mln adamǵa jýyqtaidy eken. Osy adami resýrsty biz nege durys paidalanbaimyz?», - dep toqtaldy Q. Isa Úkimet basshysynyń atyna joldanǵan saýalynda.
Onyń aitýynsha, sońǵy jyldary kóshi-qon baiaýlap qalǵan. Bunyń birden bir sebebi kezinde kóshi-qondy jandandyrǵan Kóshi–qon agenttiginiń joiylyp, migratsiiamen ainalysý birneshe ministrlikke, kvotaǵa usynys berý ár oblys ákimdigine berilgeninen bolyp tur.
«Sondyqtan búginde ár ministrlikke shashyrap ketken basqarmalardy bir organǵa jinap, Demografiia jáne kóshi-qon jónindegi agenttikti qaita qurý kerek. Ekinshiden, qandastarymyzdyń Azamattyq alý máselesi áli qiyndyqtan shyǵa almai keledi. Bizde ulty qazaq qandastar úshin kerek qujat sanyn barynsha shektep, birden Azamattyq beriletin bolýy tiis», - dedi Qazybek Isa.
Osy oraida ol qandastardy ásirese eldiń soltústigi men shyǵysyna qonystandyrý kerektigin, bul óńirlerdegi aýyldarda bos qalǵan úilerdiń baǵasy 200-500 myń teńge arasynda ekenin aitty.
