Májilis depýtaty Qazybek Isa QR Bilim jáne ǵylym ministri A.Aimaǵambetovke «Aq jol» fraktsiiasy atynan depýtattyq saýal joldap, qandas jastardyń bilim alý máselesine qatysty ózekti taqyryptardy kóterdi. Osy oraida Ult portaly depýtattyq saýaldyq tolyq mátinin usynady.
***
QR Bilim jáne ǵylym ministri A.Aimaǵambetovke depýtattyq saýal
Qurmetti Ashat Qanatuly!
Búginde shekaranyń arǵy betindegi myńdaǵan qarakóz balalarymyz joǵary bilim alý úshin Atamekenge qol sozyp tur. Al qol ushyn berýi tiis bizdiń Bilim ministrligi ne isteýde?
Ulttyq Biryńǵai Test ortalyǵy basshylyǵy «Qandastar UBT-ny Qazaqstanǵa kelip tapsyrýlary kerek, onlain bolmaidy» dep otyr. Sonda ministrliktiń Ulttyq testileý ortalyǵy pandemiia kezinde, shekaralar shegendeýli, kedender kógendeýli kezde álemdi jailap alǵan jaman indetti kórmeitindei, basqa planetada ómir súrip jatyr ma?
Ulttyq testileý ortalyǵy qandastardy biyl 15 sáýirden 30 maýsymǵa deiin qabyldaidy. Testileý quny aqyly -2242 teńge.
Álemniń kóp elderiniń esigi jabyq ekendigin eskerip, pandemiianyń kelesi tolqyndarynyń kúshtiligin boljasaq, shekaranyń maýsym aiyna deiin ashylmaityndyǵy aiqyn. Iaǵni, biz Atamekende bilim alamyz degen qandastarymyzdy oqýǵa qabyldai almai qalýymyz múmkin.
Al bizdiń Úkimettiń 2020-2030 jyldarǵa arnalǵan Syrtqy saiasat tujyrymdamasynda qandastarǵa barynsha jan-jaqty qoldaý jasaý atap kórsetilgen. Shet elderdegi qazaq qaýymdary shoǵyrlanyp turatyn jerlerde qazaq tili men mádenietin damytýǵa, olardyń tarihi Otanymen bailanysyn saqtaýyna, onyń ishinde Dúniejúzi qazaqtarynyń qaýymdastyǵy jáne «Otandastar» qory arqyly qoldaý kórsetýge nazar aýdarylǵan.
Sheteldegi qandastardy Qazaqstanǵa shaqyrýdyń biregei joly ol – atamekende tegin bilim alýǵa múmkindik jasaý.
Sol sebepti, sońǵy ótken quryltaida Elbasy sheteldegi qazaq balalarynyń Qazaqstanda bilim alýyna jaǵdai jasaýǵa, kvotany 2 ese kóbeitip, (2%-dan 4%-ǵa deiin), 2 myńdai balaǵa jetkizýge tapsyrma bergen edi.
Alaida bul granttar eshqashan tolyq igerilgen emes.
Basty sebeptiń biri – qandas talapkerlerdiń Ulttyq biryńǵai testileýdi tapsyra almaýy. Joǵary oqý oryndarynyń «daiyndyq bólimderindegi» 9 ai daiyndalýy, olardyń 11 jyldyq qazaqstandyq mektep baǵdarlamasyn igerýine jetkiliksiz.
Mysaly 2020 jyly 2022 qandasymyz Qazaqstanǵa oqýǵa talaptanyp, tek 930 úmitker ǵana oqýǵa múmkindik aldy. Endi olardyń óziniń bul oqýlaryn jalǵastyrýy qiyn bolyp tur…
Joǵaryda aitylǵan túrli kedergiler men problemalar qandastardyń oqýǵa túsý múmkindigin shektep tur. Nege biz Qazaq Elinde oqýǵa niet bildirgen barlyq qazaq jastaryn túgel qabyldap almaimyz?!
Shetelden kelip oqityn qazaqtyń balalary – keiingi kóshtiń aldyńǵy tizgini. Ol elimizde jumysqa ornalasyp, oryn tirep, qazyǵyn myqtap qadasa, sońynda qalǵan ata-ana, baýyr-týys, el-jurtyn ózderi-aq ákelip, qonystandyryp, ornalastyrady. Kósh jalǵasady, jandanady.
Qazaqstanǵa oqýǵa kelgen balalarynyń artynan otbasylary da erip kelgenderi óte kóp.
Mysaly, elimizge 2 myń bala keletin bolsa, olardyń árqaisysynyń aǵaiyn-týystaryn aitpaǵanda, otbasynda keminde 5 adamnan bar dep sanaǵanda, bul 10 myńǵa jýyq qandasymyzdyń aldynan Atamekenge Aq jol ashylýy.
Shette qalǵan baýyrlarymyz shekaradan óte almai, ańsap júrgen Atajurtqa jete almai otyrǵanda, biz jeke múddelerdiń jeteginde ketpei, nege memlekettik turǵyda qairat kórsetpeimiz?
Mysaly, dál búginde halyq sany bizden on esedei artyq Resei TMD elderine bólinetin grant sanyn 2024 jyly 30 myńǵa deiin kóterýde. Negizi, bul granttar «TMD elderi boiynsha» dep atalǵanymen, jylda kórip otyrǵanymyzdai, onyń barlyǵy derlik Qazaqstanǵa arnalǵan.
Al biz oqýǵa keletinderdi aitpaǵanda, oqýyn jalǵastyraiyn degen óz baýyrlarymyzdy, bar bolǵany 930 balamyzdy qoldan jasalǵan kedergilermen keýdelerinen keri iterýdemiz.
Osyndai qandastarǵa degen qarsy saiasatyń kesirinen sheteldegi qazaqtardyń kóship kelý kvotasy 100 myńnan 100 esege deiin azaiyp, antirekordtyq jaǵdaiǵa jetkenin ótken jolǵy Úkimetke jasalǵan depýtattyq saýalda aityp, dabyl qaqqan bolatynbyz.
Shekaranyń jabyq ekenin bile tura arjaǵynda qalǵan qandastarymyzdy oqýǵa qabyldaýdy qoldan qiyndatyp, Qazaqstanǵa kelip test tapsyrý kerek degen talapty qalai túsinemiz? Buny uly jazýshy Tolstoidyń áigili mysalyndaǵy túlkiniń tyrnany qonaqqa shaqyryp alyp, ishe almaityn ydysqa as quiyp berýinen de asqan mazaq deýge bolady…
Bizdiń túsinbei otyrǵanymyz, 2020 jyly osy myńǵa jýyq qandasymyzdyń daiyndyq kýrstarda oqýyna memleketten kóp qarjy bólindi. Al endi sol balalar UBT tapsyryp oqýǵa túsýi kerek. Barlyǵy shet memleketterde turatyn olar pandemiia tosqaýylynda Qazaqstanǵa qalai keledi? Sonda memleket qarjy bólip, oqytyp alyp, olardy jarty jolda tastap kete bere me? Memlekettiń qyrýar qarjysy qaida qalady?
Kórshi el Qytaida bolyp jatqan bárimizge belgili saiasi qatań qysym saldarynan 2019 jyly 50-ge jýyq qana bala oqýǵa kele aldy. Búginde 300-den astam bala kelýi yqtimal bolyp tur. Olar Qytaidan shekara asyp jete alǵan jaǵdaida da, bizdiń úkimet qushaq jaiyp qarsy ala qoia ma?…
Pandemiia kezinde barlyq elderde áleýmettik jaǵdaiy tómendep ketti. Osyny da eskerý kerek. Óitkeni qazirgi ýaqytta bir memleketten ekinshi memleketke baryp kelýi ońai emes, arnaiy ruqsat alý kerek, PTsR test tapsyrý kerek, qarajat shyǵyny kóp.
Byltyr 2020 jyly pandemiianyń eń qiyn kezeńinde qandas talapkerlerdiń talabyn qoldap, Ulttyq birińǵai testileýdi tegin túrde onlain formatta ótkizip, 1 myńǵa jýyq qandasymyzdy memlekettik grantpen oqýǵa qabyldadyq. Bul endi oń tájiribeniń bar ekendigin kórsetedi. Endi nege sol byltyrǵy tájiribemen UBT-ny onlain qabyldamasqa?!
Biylǵy jyly jasalǵan testileý talaptary men erejelerine jaqsy ózgerister eńgizilgeni ras. Biraq testileý jeke oqý ortalyǵynda tapsyrylýda. Ol Testileý ortalyǵynyń mekemesi me, qojaiyny kim ekeni belgisiz? (Bul – búkil Qazaqstanda UBT ótkizip, tabys taýyp otyrǵan uiym). Sonda qandas baýyrlarymyzdyń taǵdyry bir kommertsiialyq uiymnyń sheshimine táýeldi bolyp otyr ma?
Shetelderden kelgen qazaq balalaryn oqytý úshin daiarlyq bólimderin elimizdegi árbir JOO janynan kóptep ashý kerek. Kvota sanyn arttyra otyryp, jataqhana, stipendiiamen mindetti túrde qamtylýy tiis. Ásirese mundai daiarlaý kýrstaryn soltústik óńirlerde kóp ashý qajet. Keiin de sol balalardyń sol jaqta qalyp qoiýlaryna jaǵdai jasalý kerek. Bul «Serpin» baǵdarlamasyna qosymsha serpin beretini anyq.
Shetelden kelip, QR azamattyǵyn qabyldaǵan qazaq balalaryn da daiarlyq kýrstaryna grantpen qabyldap, JOO-ǵa túsýde teńdei jeńildik qarastyrylsa. Sebebi, buǵan deiin azamattyq alǵan diaspora ókilderiniń balalary bul sanatqa kirmei, kvota, granttardan qaǵylyp keledi.
Sheteldegi qandas stýdentterdi grant kúiinde de, aqyly oqý túrinde elimizdegi sol deńgeiles oqý oryndaryna aýystyryp alý joldaryn izdeý kerek. Óitkeni kóp otbasylar Qazaqstanǵa keleiin dese, oqyp jatqan balalarynan shyǵa almai bailanyp otyr.
Shetelden bilim izdep kelgen qazaq balalaryn tek bakalavr emes, magistratýra, aspirantýralar, doktorantýraǵa qabyldaý josparyn keńeitip, grantqa túsýde, jumysqa ornalasýlaryna jaǵdai qarastyrylýy qajet.
Sheteldegi qazaq diasporasynyń balalaryn qazirgi pandemiia jaǵdaiyna bailanysty onlain qabyldap, onlain oqyta berýdi de júzege asyrý kerek. Bul shaqyrtý jiberý pasport daiarlap, viza alý, jol shyǵyndary siiaqty qujattyq máselelerin retteýdi de ýaqytsha sheshedi, ári ata-ana, jaqyndarynyń qasynda júrip-aq Qazaqstannan bilim alýdy jalǵastyra beredi.
Shetelderdiń ózine baryp (Resei, Mońǵoliia, Ózbekstan), sol jaqtaǵy qazaq mádeni uiymdarynyń, elshiliktiń kómegimen qazaqtyń balalaryn sol jerde iriktep, qabyldap, Qazaqstandaǵy JOO-nyń daiarlyq kýrstaryna birden daiyndap ákelýdi jolǵa qoiý kerek.
Osy máselelerdiń barlyǵyn eskerip, shekara ashylmaǵan jaǵdaida, UBT tapsyrýdyń utymdy joldaryn usynamyz:
1. Qandastar úshin UBT talaptaryn jeńildetý kerek. (Mysaly, Bolon protsesi arqyly shetel azamattary Qazaqstanǵa oqýǵa túskende jeńil formatta eki emtihan tapsyrady: motivatsiialyq hat jáne suhbatasý);
2. Qandastar turyp jatqan memleketterge baryp qabyldaý qajet;
3. Elshilikterdiń ǵimaratarynda uiymdastyrý;
- 2020 jylǵy tájiribeni paidalanyp, onlain qabyldaý.
5. Shetelderden kelgen qazaq balalaryn oqytý úshin daiarlyq bólimderin elimizdegi árbir JOO janynan kóptep ashý kerek. Ásirese, mundai daiarlaý kýrstaryn soltústik óńirlerde kóp ashý qajet.
6.Sheteldegi qandas stýdentterdi grant kúiinde de, aqyly oqý túrinde elimizdegi sol deńgeiles oqý oryndaryna aýystyryp alý joldaryn izdeý kerek.
Qurmetpen, «Aq jol» fraktsiiasy depýtattary
