Ál-Farabi atyndaǵy QazUÝ ýniversitetiniń ókilderi jer satty degen aiyptaýǵa jaýap berdi. Buǵan deiin Jelide buryn QazUÝ-ǵa tiesili jer jeke tulǵaǵa berildi degen málimet paida bolǵan edi, - dep habarlaidy "Ult aqparat".
"Osyǵan bailanysty talqylanyp jatqan jer máselesine qatysty túsinik berý qajet dep sanaimyz. Birinshiden, ýniversitet te, QazUÝ-dyń laýazymdy tulǵalary da jer ýchaskesiniń bir bóligin úshinshi tulǵalardyń paidasyna ielikten shyǵarýǵa kelisim bermedi jáne jer ýchaskesin basqa tásilmen bólýge qatysqan joq. Aita ketý kerek, barlyq múlik pen jer memlekettik aktiv bolyp sanalady, sondyqtan JOO-da olardy ielený, paidalaný jáne bilik etý quqyǵy joq", - delingen QazUÝ resmi saitynda.
QazUÝ ókilderi QR Jer Kodeksiniń 43, 44-1 jáne 48-baptary, sondai-aq "Memlekettik múlik týraly" QR Zańynyń 4-babynyń 1-tarmaǵy memlekettik múlikti, onyń ishinde jer ýchaskelerin basqarý, berý/satý salasyndaǵy memlekettiń quqyqtary men mindetterin belgileitinin atap ótti.
"Osy zańdardyń baptarynda sheshimder qabyldaý tártibi zańnamalyq túrde kórsetilgen, sondai-aq memleketke tiesili múlik pen jerge qatysty kez kelgen jeke sheshim qabyldaý alyp tastalǵan. "Demek, ýniversitet basshylyǵy óz qalaýy boiynsha Memlekettik múlik pen jerdi berýdi jeke ózi júzege asyra almaidy", - deidi JOO ókilderi.
"Osylaisha, áleýmettik jelilerdegi QazUÝ basshylyǵy jerdi berýge qatysy bar degen jazbalar shyndyqqa sáikes kelmeidi jáne ol JOO-nyń bedelin túsirýge baǵyttalǵan. Joǵaryda aitylǵandarǵa bailanysty qazirgi ýaqytta quqyq qorǵaý organdaryna sharalar qabyldaý týraly ótinish joldandy", - dedi QazUÝ ókilderi.
