Foto: QR ǴJBM
Ál-Farabi atyndaǵy Qazaq ulttyq ýniversiteti men Qytaidyń Soltústik-Batys politehnikalyq ýniversiteti (SBPÝ) birlesip ázirlegen «Qazaqstan – Qytai» nanospýtnigi 13 jeltoqsanda Beijiń ýaqyty boiynsha saǵat 09:08-de 530 shaqyrym biiktikte orbitaǵa sátti shyǵaryldy, dep habarlaidy Ult.kz.
Ǵaryshtyq zertteýlerge arnalǵan bul qurylǵy Ziwei Aerospace kompaniiasynyń «Dier-5» (Iao-8 missiiasy) ǵarysh apparaty arqyly «Kýaichjoý-11» zymyran tasyǵyshymen orbitaǵa jetkizildi.
Aita keteiik, 2024 jyly QazUÝ men SBPÝ mikrospýtnikterdi zertteý baǵytynda birlesken ǵylymi jumystar júrgizý týraly kelisimge qol qoidy. Bul kelisim QR Prezidenti Qasym-Jomart Toqaev pen QHR Tóraǵasy Si Tszinpinniń resmi sapary kezinde kelisilgen bolatyn.
Nanospýtnik birneshe negizgi mindetterdi júzege asyrady, atap aitqanda, maqsattardy joǵary turaqtylyqpen manevrli baqylaý, ikemdi sensorlarǵa negizdelgen platforma baǵdaryn dinamikalyq qabyldaý jáne kompensatsiialaý, sonymen qatar OpenHarmony ashyq bastapqy kody bar operatsiialyq júiege negizdelgen qashyqtyqtan zondtaý keskinderin avtonomdy taný.
Ázirlemeniń negizgi tórt artyqshylyǵy bar:
- - kommertsiialyq komponentter men innovatsiialyq dizain arqyly joǵary ekonomikalyq tiimdilik;
- - joǵary turaqtylyq pen dál baǵyttaý;
- - orientatsiia qatelerin beiimdelgen túrde kompensatsiialaýǵa arnalǵan joǵary esepteý qýaty;
- - derekterdi Jerge jyldam alyp-jetkizý úshin joǵary operativtik árekettestik.
Joba QazUÝ bazasyndaǵy SBPÝ filialy, «Bir beldeý – bir jol» bastamasy aiasyndaǵy ulttyq birlesken zertteý laboratoriiasy, Áýe-ǵarysh institýty jáne Ikemdi elektronika ulttyq negizgi zerthanasynyń qoldaýymen júzege asyryldy.
Jobanyń konsýltanty – akademik Hýan Vei, jalpy jetekshisi – professor Iýe Siaokýi, jetekshiniń orynbasary – QazUÝ professory Záýre Raqysheva. Birlesken zertteý tobyna Qazaqstan men Qytaidan 20-dan astam maman jáne jas zertteýshi qatysty.
Bul birlesken jumys ǵaryshty zertteý, bilikti mamandar daiarlaý jáne ortaq spýtnikterdi jasaý, sondai-aq mikrospýtnik arqyly Jerdi qashyqtyqtan zertteý múmkindigin beredi.
