Ál-Farabi atyndaǵy qazaq ulttyq ýniversitetiniń ujymy Shyǵys Qazaqstan oblysyndaǵy sý tasqynynan zardap shekken turǵyndarǵa qarjylyq kómek kórsetti, dep habarlaidy ataǵan joǵary oqý ornynyń baspasóz qyzmeti.
QazUÝ ǵalymdary men oqytýshylary sý tasqyny kezinde qiyn jaǵdaiǵa tap bolǵan jandarǵa kómek kórsetý úshin bir kúndik eńbek jalaqylaryn aýdarý jónindegi joǵary oqý orny basshylyǵy men kásipodaq komitetiniń usynysyn biraýyzdan qoldady.
«Biz kúndelikti jańalyqtardan apat saldarynyń qalai joiylyp jatqanyn kórip otyrmyz, osy óńirdiń turǵyndarynyń qaiǵysyna ortaqpyz. Adamdar baspanasyz qaldy, múlikterinen airyldy. Osyndai qiyn tusta búkil el olarmen birge ekendigin sezingen óte mańyzdy», - dep atap ótti Filosofiia jáne saiasattaný fakýltetiniń dekany Áliia Masalimova.
Eshbir kafedra, eshbir oqytýshy, ýniversitettiń eshbir bólimi tys qalǵan joq. Ýniversitet qyzmetkerleriniń materialdyq kómegi arnaiy qarajat esebine aýdaryldy, qarajat jinaý jumysy odan ári jalǵastyrylatyn bolady.
«Biz zardap shekkenderden alystamyz, alaida osy jinalǵan qarajat olarǵa qandai da bir járdem bolar dep úmittenemiz. Sý tasqynynan zardap shekken aýdandarda bizdiń keibir oqytýshylarymyzdyń týysqandary men tanystary turady, sondyqtan da biz olardyń qaiǵysyn jeke basymyzdyń qaiǵysyndai qabyldaimyz», - dedi Jýrnalistika fakýltetiniń dotsenti Marlan Negizbaeva.
