Nursultan Nazarbaev Abai atyndaǵy Qazaq ulttyq pedagogikalyq ýniversitetiniń rektory Takir Balyqbaevty qabyldady, dep habarlaidy "Ult aqparat" Aqordaǵa silteme jasap.
Kezdesýde Memleket basshysyna joǵary oqý ornynyń qyzmeti jáne «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty joldaýdy iske asyrý aiasynda atqaryp jatqan jumystary jóninde esep berildi.
Qazaqstan Prezidenti elimizdegi joǵary bilim berý júiesin qalyptastyrý jáne damytý úderisindegi Abai atyndaǵy Qazaq ulttyq pedagogikalyq ýniversitetiniń rólin atap ótti.
– Bul ýniversitet – Qazaqstannyń alǵashqy joǵary oqý oryndarynyń biri. Elimizdegi joǵary bilim berý júiesiniń negizi osy oqý ordasynan bastaý alady deýge bolady. Siz jáne búkil oqytýshy-professorlar quramy otandyq bilim berý isine aldaǵy ýaqytta da úles qosatyndaryńyzǵa senemin, – dedi Elbasy.
Nursultan Nazarbaev biylǵy joldaýda oqytý jáne aǵartý qyzmeti men stýdent jastardyń jaǵdaiyn jaqsartý máselelerine basa mán berilgenin aitty.
– Pedagogter mártebesin arttyrý – mańyzdy mindetterdiń biri. Osy mindetti júzege asyrý barysynda ýniversitetterińiz aldyńǵy shepte bolýǵa tiis. Bul máseleni jan-jaqty pysyqtaý qajet, – dedi Memleket basshysy.
Sonymen qatar, Qazaqstan Prezidenti ýniversitettiń qazirgi zamanǵy ǵylymi-tehnikalyq progress talaptaryna sai bolý kerek ekenin atap ótti.
– Álemniń aldyńǵy qatarly oqý oryndarymen yntymaqtasyp, bailanys ornatqan jón. Tájiribe almasyp, birlese jumys isteý qajet. Sondai-aq, Abai atyndaǵy Qazaq ulttyq pedagogikalyq ýniversitetiniń mártebesin arttyrý jónindegi jumystardy jalǵastyrýdyń mańyzy zor. Siz basqaratyn ýniversitet pedagogikalyq bilim beretin basty oqý orny bolýǵa tiis, – dedi Memleket basshysy.
Kezdesý barysynda Qazaqstan Prezidenti QazUPÝ rektoryn ýniversitettiń 90 jyldyq mereitoiymen quttyqtap, osy aitýly kúnge orai barlyq oqytýshy-professorlar quramy men stýdentterge quttyqtaý sózin joldady.
T.Balyqbaev Nursultan Nazarbaevqa biylǵy joldaýdyń erejelerine sáikes oqý orny aldyna qoiylǵan mindetterdi oryndaý barysy jáne ýniversitetti damytý josparynyń júzege asyrylýy jóninde baiandady. Rektordyń málimetine sáikes, ýniversitet QS World University Rankings 2019 esebi boiynsha úzdik top-500 joǵary oqý oryndarynyń qataryna engen.
