«Qazposhta» AQ Poshta qyzmetteri jáne E-commerce boiynsha basqarýshy direktory Áliia Súgirbaeva AQSh-tan jetkizilgen sálemdemedegi uialy telefonnyń joǵalýy jónindegi daýly oqiǵaǵa pikir bildirdi, dep habarlaidy QazAqparat.
Onyń aitýynsha, bul halyqaralyq poshtalyq jóneltim AQSh-tan Ystanbul reisiniń tranziti arqyly Qazaqstannyń Almaty qalasyna jetkizilgen.
«2021 jyldyń 22 qańtarynda áýe reisi kelgen sátte bul poshta jóneltimi Almaty qalasy ýchaskesiniń qyzmetkerlerine berilgen. Olar birden Almaty qalasy Kedendik baqylaý departamentiniń Jetisý keden beketiniń qyzmetkerlerine kedendik tekserýge usynǵan. Keden zańnamasyna sáikes, kelip túsetin barlyq halyqaralyq jóneltimder mindetti túrde kedendik tekserýden ótýi tiis. Tekserý kezinde keden beketiniń qyzmetkerleri jóneltimniń derekterin kedendik deklaratsiiamen salystyrady, onda jóneltýshiniń, alýshynyń mekenjaiy, taýar (salynym) ataýlarynyń tolyq tizbesi jáne árbir salynymnyń quny kórsetiledi. Jetisý keden beketi qyzmetkeriniń tekserýi barysynda kedendik deklaratsiiaǵa sáikes, bul klienttiń poshta jóneltimindegi taýarlardy salý tizbesinde uialy telefon kórsetilmegen», - dedi Á. Súgirbaeva «Qazposhta» ǵimaratynda ótken brifingide.
Sonymen birge spiker poshta jóneltiliminiń rentgen-televiziialyq qondyrǵy arqyly ashpai skanerlengenin jáne onda uialy telefonnyń kórsetilmegenin jetkizdi.
«Kompaniia Almaty qalasynyń memlekettik kirister departamentine atalǵan poshta jóneltilimin tekserý boiynsha rentgen-teledidar jabdyqtarynyń arhivin qaraýǵa resmi suraý saldy. 12 aqpanda departament qyzmetkerleri resmi jaýap berip, beinematerialdar arhivine sáikes, kedendik tekserý organdarynyń osy sálemdemeni tekserýi kezinde uialy telefonnyń bolmaǵany týraly akt jasady.
Bul jóneltimdi internet-dúken emes, jeke adam jibergen, alýshy retinde Ilia Grishko kórsetilgen. Sondai-aq, 72-deklaratsiiaǵa sáikes, poshta jóneltilimderi tiziminde IPhone12 uialy telefony kórsetilmegen, bul barlyq tiisti qujattar arqyly rastalǵan. Onyń ústine, uialy telefon jiberilgen jaǵdaida, jiberýshi mindetti túrde kedendik deklaratsiiada onyń qunyn kórsetýi kerek», - deidi Á. Súgirbaeva.
Aita keteiik, 10 aqpanda birqatar BAQ-ta elorda turǵyny Ilia Grishko týraly siýjet shyqqan edi. Onda I. Grishko «Qazposhta» sálemdemesinde ózi tapsyrys bergen uialy telefonnyń joǵalýyna shaǵymdanǵan.
