«قازپوشتا» اق پوشتا قىزمەتتەرٸ جەنە E-commerce بويىنشا باسقارۋشى ديرەكتورى ەلييا سٷگٸرباەۆا اقش-تان جەتكٸزٸلگەن سەلەمدەمەدەگٸ ۇيالى تەلەفوننىڭ جوعالۋى جٶنٸندەگٸ داۋلى وقيعاعا پٸكٸر بٸلدٸردٸ, دەپ حابارلايدى قازاقپارات.
ونىڭ ايتۋىنشا, بۇل حالىقارالىق پوشتالىق جٶنەلتٸم اقش-تان ىستانبۇل رەيسٸنٸڭ ترانزيتٸ ارقىلى قازاقستاننىڭ الماتى قالاسىنا جەتكٸزٸلگەن.
«2021 جىلدىڭ 22 قاڭتارىندا ەۋە رەيسٸ كەلگەن سەتتە بۇل پوشتا جٶنەلتٸمٸ الماتى قالاسى ۋچاسكەسٸنٸڭ قىزمەتكەرلەرٸنە بەرٸلگەن. ولار بٸردەن الماتى قالاسى كەدەندٸك باقىلاۋ دەپارتامەنتٸنٸڭ جەتٸسۋ كەدەن بەكەتٸنٸڭ قىزمەتكەرلەرٸنە كەدەندٸك تەكسەرۋگە ۇسىنعان. كەدەن زاڭناماسىنا سەيكەس, كەلٸپ تٷسەتٸن بارلىق حالىقارالىق جٶنەلتٸمدەر مٸندەتتٸ تٷردە كەدەندٸك تەكسەرۋدەن ٶتۋٸ تيٸس. تەكسەرۋ كەزٸندە كەدەن بەكەتٸنٸڭ قىزمەتكەرلەرٸ جٶنەلتٸمنٸڭ دەرەكتەرٸن كەدەندٸك دەكلاراتسييامەن سالىستىرادى, وندا جٶنەلتۋشٸنٸڭ, الۋشىنىڭ مەكەنجايى, تاۋار (سالىنىم) اتاۋلارىنىڭ تولىق تٸزبەسٸ جەنە ەربٸر سالىنىمنىڭ قۇنى كٶرسەتٸلەدٸ. جەتٸسۋ كەدەن بەكەتٸ قىزمەتكەرٸنٸڭ تەكسەرۋٸ بارىسىندا كەدەندٸك دەكلاراتسيياعا سەيكەس, بۇل كليەنتتٸڭ پوشتا جٶنەلتٸمٸندەگٸ تاۋارلاردى سالۋ تٸزبەسٸندە ۇيالى تەلەفون كٶرسەتٸلمەگەن», - دەدٸ ە. سٷگٸرباەۆا «قازپوشتا» عيماراتىندا ٶتكەن بريفينگٸدە.
سونىمەن بٸرگە سپيكەر پوشتا جٶنەلتٸلٸمٸنٸڭ رەنتگەن-تەلەۆيزييالىق قوندىرعى ارقىلى اشپاي سكانەرلەنگەنٸن جەنە وندا ۇيالى تەلەفوننىڭ كٶرسەتٸلمەگەنٸن جەتكٸزدٸ.
«كومپانييا الماتى قالاسىنىڭ مەملەكەتتٸك كٸرٸستەر دەپارتامەنتٸنە اتالعان پوشتا جٶنەلتٸلٸمٸن تەكسەرۋ بويىنشا رەنتگەن-تەلەديدار جابدىقتارىنىڭ ارحيۆٸن قاراۋعا رەسمي سۇراۋ سالدى. 12 اقپاندا دەپارتامەنت قىزمەتكەرلەرٸ رەسمي جاۋاپ بەرٸپ, بەينەماتەريالدار ارحيۆٸنە سەيكەس, كەدەندٸك تەكسەرۋ ورگاندارىنىڭ وسى سەلەمدەمەنٸ تەكسەرۋٸ كەزٸندە ۇيالى تەلەفوننىڭ بولماعانى تۋرالى اكت جاسادى.
بۇل جٶنەلتٸمدٸ ينتەرنەت-دٷكەن ەمەس, جەكە ادام جٸبەرگەن, الۋشى رەتٸندە يليا گريشكو كٶرسەتٸلگەن. سونداي-اق, 72-دەكلاراتسيياعا سەيكەس, پوشتا جٶنەلتٸلٸمدەرٸ تٸزٸمٸندە IPhone12 ۇيالى تەلەفونى كٶرسەتٸلمەگەن, بۇل بارلىق تيٸستٸ قۇجاتتار ارقىلى راستالعان. ونىڭ ٷستٸنە, ۇيالى تەلەفون جٸبەرٸلگەن جاعدايدا, جٸبەرۋشٸ مٸندەتتٸ تٷردە كەدەندٸك دەكلاراتسييادا ونىڭ قۇنىن كٶرسەتۋٸ كەرەك», - دەيدٸ ە. سٷگٸرباەۆا.
ايتا كەتەيٸك, 10 اقپاندا بٸرقاتار باق-تا ەلوردا تۇرعىنى يليا گريشكو تۋرالى سيۋجەت شىققان ەدٸ. وندا ي. گريشكو «قازپوشتا» سەلەمدەمەسٸندە ٶزٸ تاپسىرىس بەرگەن ۇيالى تەلەفوننىڭ جوعالۋىنا شاعىمدانعان.
