16 qazan kúni Astana qalasynda «Tsifrlyq Qazaqstan» memlekettik baǵdarlamasy aiasynda «Qazposhta» AQ-nyń uiymdastyrýymen Elorda turǵyndaryna arnalǵan «E-commerce Meet UP» ótkizildi. Sharany ótkizýdegi basty kózdelgen maqsat elimizdegi elektrondy saýdany damytyp, mańyzyn joǵarylatý. Osy salada jumys jasap júrgen nemese iske jańa kirisip otyrǵan jeke kásipkerlerge onlain saýdanyń máni men mańyzy jaiynda aityldy.
«Qazposhta» AQ elektrondy saýda departamentiniń direktory Mustafin Sultannyń aitýynsha, negizgi mindet elektrondy saýdamen ainalysatyn seriktesterdi iske shaqyrý, osy arqyly elektrondy saýda naryǵyn alǵa shyǵarý. Bul ortalyqta elektrondy saýdamen ainalysqysy keletin kásipkerge barlyq jaǵdai jasalǵan.
«Biz búgin e-commerce ortalyǵyndamyz. Bul jalpy aitqanda internet biznespen ainalysatyn kásipkerlerge qyzmet kórsetý bólimshesi. Qazposhta árdaiym bul júieni logistika retinde usynyp otyrdy. Endi biz naqty biznesti damytýǵa bel býdyq. Iaǵni ózimiz emes, kerisinshe osy salada jumys jasaýǵa qulshynys bildiretin kásipkerlerdi tartý arqyly. Dálirek aitsam, ózgelerdi tartý arqyly Qazaqstandaǵy elektrondy saýdanyń órkendeýine úles qosý. Ol úshin elektrondy saýda qyzyqtyratyn seriktesterdi shaqyryp, osy ortalyqta olarǵa internet-dúkender, marketing pen satý bólimimen tanystyratyn jiyndar uiymdastyryp otyramyz», – dedi Mustafin Sultan.
Sonymen qatar sharada atalǵan ortalyqtyń bilikti mamandary kásipkerlerdi óz qyzmetterimen tanystyryp, tereńdetilgen keńes alýǵa shaqyrdy. Olardyń ishinde internette jarnamalaý, marketing, taýardy jetkizý boiynsha fýlfilment, CRM júiesi boiynsha mamandar qatysty.
«E-commerce ortalyǵynyń jumysy kásipkerlerge baǵyttalǵan. Biz sizderge kelesi qyzmetterdi usynamyz: internet marketingti basqarý, aýtsorsing býhgalteri, CRM júiesi, satý bólimi, onlain satý boiynsha óz saityn qurý. Sizge yńǵaily bolý úshin kórshi zalda mamandar otyrady jáne olar sizge keńes berýge daiyn», – dep atap ótti Astana qalasy boiynsha E-commerce jobasynyń jetekshisi Dúisenbaev Erkebulan.
Meet UP-ta elektrondy saýdadaǵy kásipkerlerdi qyzyqtyratyn trendter jaiynda da aityldy.
Spikerler internet marketingke salystyrmaly taldaý jasap, negizgi uǵymdarymen tanystyrdy. Sondai-aq landing page boiynsha málimetter aityldy. Odan ári internette taýarlardy satý qyzmeti boiynsha, tiimdi online satý quraldarymen tanystyryp, targettik jarnamalarynyń qyr-syryn ashyp, bolashaq seriktesterine paidaly aqparat pen keńesterin aitty.
Sondai-aq, seminar barysynda e-commerce ortalyǵynyń atqarýshy direktory Nurlyhan Hamzat tilshilerge bergen suhbatynda internet-saýdany bastaǵandaǵy alǵashqy tájiribelerimen bólisti.
«Alǵashynda biz shaǵyn ǵana keńse ashyp, jumysymyzdy bastaǵanbyz. Eń alǵashqy taýarymyz kádimgi kókónis keskish qural boldy. Syrt kózge oǵash estiletin bolar, biraq biz internet-saýdany dál osylai 8 naýryzdyń aldynda bastadyq. Eń alǵashqy kúnniń ózinde bidiń taýarǵa 200 adam qyzyǵýshylyq bildirip, tapsyrys berdi. Al bizde bar joǵy 50 kókónis keskish qural bolatyn. Odan ári jumysymyzdy jalǵastyryp basqa da taýarlardy tikelei zaýytqa tapsyrys berý arqyly sata bastadyq. Barlyǵyn ózimiz jarnamalap, satyp jáne taýardy satyp alýshyǵa jetkizip otyrdyq», – dedi Nurlyhan Hamzat.
Aita ketelik, «Qazposhta» AQ mundai sharany ár aida ótkizip turady. Osy joly elektrondy saýdaǵa qyzyǵýshylyq tanytyp, sharaǵa qatysqandar sany 100-den asty. Bul degenimiz onlain-saýdaǵa halyqtyń kún artyp qyzyǵýshylyq tanytyp kelýiniń kórsetkishi.
Qalidolla Áigerim
