Qaznet qoldanýshylary Shymkenttegi mamandandyrylǵan halyqqa qyzmet kórsetý ortalyǵyndaǵy dúrbeleńdi talqylap jatyr, - dep habarlaidy Tengrinews.kz tilshisi.
Áleýmettik jelide halyqqa qyzmet kórsetý ortalyǵy ǵimaratynyń qaqpasy ashyla salyp, adamdar japa-tarmaǵai esikke umtylǵany túsirilgen video paida boldy. Kezekke umtylǵan jurt qorshaýdan sekirip jatqany kórinedi. Qoldanýshylar kadrlardaǵy kórinisti "zombilar" dep ataǵan.
"Azamattarǵa arnalǵan úkimet" oqiǵa Shymkenttegi №1 arnaiy HQKO-da bolǵanyn habarlady. Oqiǵa nátijesinde klientter tarapynan quqyq buzý derekteri tirkelmegen. Sondai-aq, múlikke eshqandai ziian kelmegen.
"Qazirgi ýaqytta onda kezek kóp. Kópshiligi C1 sanatyna ("Gazel" júk) júrgizýshi emtihanyn tapsyrýǵa kelgender. Sebebi, qaladaǵy eki avtodromnyń birinde jóndeý jumystary júrip jatyr. Arnaiy HQO-nyń ózi shtattyq rejimde jumys istep, avtokólikterdi qaita tirkeý jáne teoriialyq emtihan tapsyrý qyzmetine klientterdi qabyldady.
Aqpannyń aiaǵynan bastap avtodrom jumysyn jalǵastyryp, kólik júrgizýdiń barlyq sanattary boiynsha tutynýshylardy qabyldai bastady. Degenmen, osy ýaqyt ishinde praktikalyq emtihan tapsyrýǵa niet bildirgen azamattardyń qatary jinalyp qaldy", - dedi memlekettik korporatsiia ókilderi.
Olardyń aitýynsha, bul arnaiy HQO-ǵa bir millionǵa jýyq turǵyny bar Shymkent qalasynyń turǵyndarynyń ǵana emes, eki millionnan astam halqy bar búkil Túrkistan oblysynyń turǵyndarynyń júginýi jaǵdaidy qiyndatyp otyr.
"Jaǵdaidy eskere otyryp, qazirgi ýaqytta arnaiy HQO-nyń jumys kestesi uzartyldy. 19, 20 jáne 23 naýryzda bul filial ádettegidei saǵat 8.00-den 19.00-ge deiin jumys isteidi. Sondai-aq, S1 sanatyn alý úshin qosymsha avtokólik bólindi", - dep tolyqtyrdy "Azamattarǵa arnalǵan úkimet" AQ ókilderi.
