«QazMunaiGaz» ulttyq kompaniiasynyń basqarma tóraǵasy Maǵzum Myrzaǵaliev búgin Shymkentte dizel otyny boiynsha kezdesý ótkizdi. Shymkent munai óńdeý zaýytynyń jumysymen tanysyp shyqqan ol jaýapty basshylarǵa dizel otyny tapshylyǵyn joiý boiynsha mańyzdy tapsyrmalar berdi, dep habarlaidy QazAqparat agenttigi.
Sapar barysynda M.Myrzaǵaliev salaǵa jaýapty basshylardyń basyn qosyp, jiyn ótkizdi. Jiynda «PetroQazaqstan Oil Prodakts» JShS (PQOP) prezidenti Erbolat Qojabaev zaýyt jumysynyń barysy men nátijelerin, óndiristik baǵdarlamanyń oryndalý jaiyn jáne keler jylǵa shegerilgen josparly jóndeý jumystaryna daiyndyq týraly esep berdi.
Onyń sózinshe, qazir «PetroQazaqstan Oil Prodakts» kompaniiasy josparly túrde jumysyn atqaryp, qajetti kólemde munai ónimderin óńdeýde. Al jóndeý jumystaryn keler jylǵa shegerý qandai da bir qiyndyqtar týǵyzbaidy.
«PetroQazaqstan Oil Prodakts» JShS aǵymdaǵy jyly 6 mln 142 myń tonna munai ónimderin óńdeý josparlanyp otyr. Jyl basynan bergi jeti aida 3,6 mln tonna munai óńdeldi. Bul rekordtyq kórsetkish deýge bolady. Ótken jylǵa qaraǵanda 1 mln tonnaǵa artyq óńdeldi. 1,2 mln tonnaǵa jýyq benzin, 1,1 mln tonna dizel otynyn shyǵardy. Sondai-aq, 204 myń tonna aviaotyn jáne basqa da munai ónimderin óndirdi. Biylǵy qarasha aiynda josparlanǵan jóndeý jumystaryn qazirgi naryqtaǵy jaǵdaiǵa bailanysty kelesi jyldyń orta tusyna qaldyryp otyrmyz. Al 2021 jyly osyndai kezeńde zaýyt 2,7 mln tonnaǵa jýyq munai óńdep, 1 mln tonnadan astam avtobenzin shyǵarǵan bolatyn. 779 myń tonna dizel otynyn, 149 myń tonna áýe kerosinin óndirgenin atap ótken jón»,- dedi Erbolat Qojabaev.
Jiynda «QazMunaiGaz» basshysy Shymkent munai óńdeý zaýytynyń turaqty jumys istep turǵanyn alǵa tartyp, qazirgi ýaqytta óndiristik baǵdarlamany tolyq oryndap otyrǵanyn atap ótti. Dizel otynyn óndirý josparyn 1100 tonnadan asyra oryndap kele jatqanyn jetkizdi.
«Janar-jaǵarmai naryǵyndaǵy kúrdeli jaǵdaidyń basty sebepteri retinde kórshi eldermen baǵa disparitetin jáne Qazaqstanda óndiriletin munai ónimderin úlken kólemde quiyp áketý, sonyń ishinde dizel otynyn zańsyz áketý jaǵdailaryn keltirýge bolady. Osyǵan bailanysty ýákiletti memlekettik organdar Qazaqstan shekarasy mańynda baqylaýdy kúsheitýge jáne el aýmaǵynan munai ónimderin zańsyz shyǵarýdy toqtatý máselesine qatysty shuǵyl túrde túbegeili shara qoldaný kerek», - dedi Maǵzum Myrzaǵaliev.
Aita keteiik, qazirgi ýaqytta elimizdegi úsh munai óńdeý zaýyty da joǵary qýatynda jumys istep tur. Munai ónimderin shyǵarý jónindegi bekitilgen josparlardy tolyq oryndaýda. Al, Shymkent zaýyty munai ónimderiniń jóndeý jumystaryn keler jylǵa shegerýi elimizdegi tapshylyqty joiýǵa zor múmkindik beredi. Iaǵni, dizel otynyn óndirý boiynsha biylǵy qyrkúiek aiynyń jospary 70 myń tonnaǵa, al jyl qorytyndysy boiynsha 20 myń tonnaǵa asyra oryndalady.
Alaida elimizde janar-jaǵarmaidy zańsyz áketý jaǵdailary toqtamasa, munai óńdeýshilerdiń bul jumystary eshbir nátije bermeidi. Qazir tapshylyq máselesimen arnaiy qurylǵan komissiia ainalysyp jatyr. Tekserý qortyndysyna sáikes naqty sharalar qolǵa alynatyn bolady. Bul rette Maǵzum Myrzaǵaliev zaýyt basshylyǵyna «QazMunaiGaz» óńdeý blogymen birlesip, ýákiletti memlekettik organdarǵa joldaý úshin munai ónimderin zańsyz shyǵarý máselesi tóńireginde qajetti material daiyndaýdy tapsyrdy.
«Zaýyt basshylyǵyna PQOP-tyń turaqty jáne apatsyz jumysyn qamtamasyz etýdi, óndiris baǵdarlamasynyń jáne barlyq kórsetkishterdiń oryndalýyn tapsyramyn. Sondai-aq, qyzmetkerlerge qolaily eńbek etý men turmystyq jáne saýyqtyrý jaǵdailaryn jasaý boiynsha áleýmettik saiasatty júzege asyrýdy odan ári jalǵastyrý qajet. Úshinshiden, keler jylǵy josparly jóndeýge osy bastan daiyndyq júrgizilýi kerek. Tórtinshiden, «Qazaqstan Temirjoly» kompaniiasymen tasymal jaǵyn der kezinde qamtamasyz etý máselesin pysyqtaýdy mindetteimin»,- dedi «QazMunaiGaz» UK AQ basqarma tóraǵasy.
Jiynda, sonymen qatar munai ónimderin ýaqtyly jóneltý jáne logistika boiynsha seriktestermen ózara tiimdi is-qimyl máselesin baqylaý men uiymdastyrýdy kúsheitý qajettiligi aityldy.
Sapar barysynda Maǵzum Myrzaǵaliev Túrkistan oblysynda «SAÝTS-OIL» JShS salyp jatqan K-5 motor otynyn shyǵaratyn kómir himiiasy jáne munai himiiasy kombinattaryn da aralady. Kásiporyndar basshylyǵy QMG Basqarma tóraǵasyna eki kombinat ta munaidan bólek gaz kondensatyn, munai shlamyn, sondai-aq kómir men torf óńdeýge múmkindik beretin tehnologiialardy tanystyrdy.
