Energetika ministrliginde ótken keńesten soń Pavlodar Munai-himiia zaýyty bas direktory jumystan bosatyldy, - dep habarlaidy "Ult aqparat" ulttyq munai kompaniiasynyń saityna silteme jasap.
2017 jylǵy 7 qarashada energetika ministri Qanat Bozymbaev jumys keńesin ótkizdi. Onda Qazaqstannyń úsh MÓZ-in jańǵyrtýdyń aǵymdaǵy máseleleri talqylandy. Top-menedjerlerdiń árqaisysy zaýyttardaǵy qalyptasqan jaǵdaidy jáne JJM-nyń barlyq túrin jetkilikti mólsherde óndirýdiń jańa merzimderi týraly baiandady.
PMHZ bas direktory Shýhrat Danbaidyń aqparaty boiynsha Eýro-4 jáne Eýro-5 klasty joǵary oktandy benzindi úlken kólemde óndirýge múmkindik beretin jabdyq - katolitikalyq krekingtiń jańa qondyrǵysyn synaý 10 qarashaǵa belgilengen.
Alaida, taǵy bir úlken problema bar ekendigi anyqtaldy - zaýytta dizel otynyn óndirýge qajet sýtekti óndirý qondyrǵysy birneshe apta boiy jumys istemei tur. Ony jóndeý jeltoqsannyń ortasyna deiin sozylýy múmkin, bul elimizde dizel otynynyń jetispeýshiligine alyp kelýi múmkin.
"Qarasha jáne jeltoqsan ailarynda zaýytta dizel otynyn óndirý 150 myń tonnadan 25 myń tonnaǵa deiin tómendeidi, iaǵni ai saiyn 125 myń tonnaǵa kem. Bul aiqyn jaǵdai. Sizder jumysty oryndamadyńyzdar", - dedi Q. Bozymbaev Sh. Danbaiǵa. Óz kezeginde "QazMunaiGaz" UK" AQ Basqarma tóraǵasy Saýat Myńbaev ishki naryqta satý úshin qazirgi naryqtyq baǵamen - litryna 157-160 teńge - importtyq (reseilik) dizel otynyn satyp alý arqyly kompaniia óz shyǵyny esebinen qalyptasqan problemany sheshetindigin habarlady.
QR Energetika ministrliginde ótken keńestiń qorytyndylary boiynsha "QazMunaiGaz - qaita óńdeý jáne marketing" AQ Direktorlar keńesiniń sheshimimen Danbai Shýhrat Abdýrashitovich atqaratyn qyzmetinen bosatyldy. "PMHZ" JShS bas direktorynyń mindetin atqarýshy bolyp Alseitov Ospanbek Baltabaevich taǵaiyndaldy.
