«QazMunaiGaz» Ulttyq kompaniiasy» AQ adami resýrstardy basqarý jónindegi atqarýshy direktory Dáýletjan Hasanov kompaniiada daǵdarysqa qarsy strategiia jasalyp jatqanyn málim etti, dep habarlaidy QazAqparat.
«Ózderińiz biletindei, buǵan deiin «QazMunaiGaz» ulttyq kompaniiasynyń ortalyq apparatynda jumys isteitin qyzmetkerlerdiń sany azaiatyny týraly habarlaǵan bolatynbyz. Koronavirýs pandemiiasyna bailanysty munai ónimderine suranystyń tómendeýi kompaniianyń qarjylyq jaǵdaiyna teris áser etip otyr. Birinshi toqsanda kompaniianyń tabysy ótken jyldyń osyndai kezeńimen salystyrǵanda 3 ese azaidy. Álemdik naryqta munai baǵasynyń kúrt quldyraýy saldarynan keibir enshiles kásiporyndarymyzda qarjy tapshylyǵy baiqalyp otyr», - dedi Dáýletjan Hasanov búgin Ortalyq kommýnikatsiialar qyzmetinde ótken baspasóz máslihatynda.
Osyǵan bailanysty «QazMunaiGaz» kompaniiasynda daǵdarysqa qarsy strategiia jasalýda.
«Bul strategiia shyǵyndardy azaitýǵa jáne daǵdarystan keiingi kezeńde mekemeniń tez ári tiimdi damýyna múmkindik beredi. Osy sharalardyń aiasynda Direktorlar keńesiniń sheshimi negizinde kompaniianyń jańa qurylymy bekitildi. Oǵan sáikes ortalyq apparattaǵy shtat 34 paiyzǵa, iaǵni 729-dan 480-ge deiin qysqardy. Sonymen qatar ortalyq apparattaǵy departamentterdiń sany úsh ese azaidy. Basqarýshy direktorlar laýazymy joiyldy. Osylaisha «QazMunaiGaz» kompaniiasynyń ortalyq apparaty naryqtaǵy ózgeristerge tez ári tiimdi jaýap bere alatyndai jinaqy bolyp, qaita qurylady», - dedi ol.
