Foto: «QazMunaiGaz» UK AQ
«QazMunaiGaz» UK AQ apparatynyń basshysy Erhan Omarov bastaǵan arnaiy qurylǵan bailanys tobynyń mamandary Jańaózennen Astanaǵa kelgen munaishylarmen kelissóz júrgizdi, dep habarlaidy "Ult aqparat" kompaniianyń baspasóz qyzmetine silteme jasap.
QMG mamandarymen birge kelissózge «BerÁli Mańǵystaý Company» JShS jáne «Ai-Bis» JShS (tenderde jeńiske jetken kompaniia) basshylyǵy da qatysady. Jumysshylarǵa jalaqylaryn saqtai otyryp, «Ai-Bis» JShS jáne «Kezbi» JShS (munai servis qyzmetterin kórsetedi) kompaniialaryna jumysqa ornalastyrý usynylǵan.
«Jumysshylar basqa kompaniiaǵa aýysqan kezde olardyń burynǵy eńbek jaǵdaiy, sonyń ishinde jalaqy mólsheri men áleýmettik paketi saqtalýy kerek. Tender qorytyndysy boiynsha «Ózenmunaigaz» AQ merdigeri atanǵan kompaniiaǵa osyndai mindet qoiyp otyrmyz. Alaida, quqyqtyq rásimderge sai áreket etý kerek, jumysshylar muny túsinýi qajet», - dep atap ótti QMG apparatynyń basshysy Erhan Omarov kelissóz barysynda.
«BerÁli Mańǵystaý Company» kompaniiasynyń burynǵy qyzmetkerleri «Ózenmunaigazǵa» jumysqa turǵyzýdy talap etip, usynylǵan jumys oryndarynan bas tartty.
Jinalǵan munaishylarǵa «Ózenmunaigaz» AQ shtatyna qabyldanǵan quqyqtyq rásimderdi ainalyp ótip, jumysqa ornalasý jónindegi talap zańsyz ekeni túsindirildi. Bul Jańaózendegi jumyssyzdardy kezek boiynsha atalǵan mekemege jumysqa ornalastyrý tártibine qaishy keledi.
Bul erejeler monoqala turǵyndarynyń talabyna sai, jumys oryndaryn ádil bólý úshin qabyldanǵan bolatyn» - delingen kompaniia habarlamasynda.
Kelissózder aldaǵy ýaqytta jalǵasady.
Aita keteiik, buǵan deiin Jańaózennen kelgen jumysshylar QR Energetika ministrligi ǵimaratynyń aldyna jinalǵany habarlanǵan edi. Olar - QMG-niń enshiles kompaniiasy «Ózenmunaigaz» AQ úshin munai servis qyzmetterin kórsetýge arnalǵan tenderde utylǵan «BerÁli Mańǵystaý Company» kompaniiasynyń burynǵy qyzmetkerleri.
