Qazirgi tańda latyn álipbii úlken bedelge ie. Qoldanys aiasy da múmkindigi de zor ekendigin tanytyp otyr. Mundai tujyrymdy oiyn Iliias Jansúgirov atyndaǵy Jetisý memlekettik ýniversitetiniń oqytýshysy, filologiia ǵylymdarynyń doktory, professor Muratbek Imanǵazinov bildirdi, dep habarlaidy QazAqparat tilshisi.
Muratbek Imanǵazinovtyń aitýynsha, álem boiynsha barlyq salada latyn álipbiiniń qoldanysy keń.
«Atap aitqanda, dári-dármek ataýlary, matematika, fizika, himiia formýlalary, bárimizdiń elektrondyq poshtamyz kiril, arab, nemese basqa emes latynmen jazylǵan, kóligimizdiń nómirindegi áripter, kýáligimiz ben pasportymyz da latynmen berilgen. Qazirgi ýaqytta ǵalamtor men uialy bailanystyń jazbalaryn paidalanýshylar, ásirese, búgingi jas býyn ókilderi latyn álipbiin áldeqashan paidalanyp ta júr. Osyndai mysaldardy kóptep keltire berýge bolady. Latyn álipbiine kóshý kóptegen problemalardy sheship qana qoimai, qazaq tiliniń halyqaralyq dárejege shyǵýyna jol ashady. Elbasynyń «Bolashaqqa baǵdar: rýhani jańǵyrý» atty maqalasyndaǵy elimizdiń rýhani jańǵyrýy jónindegi kózqarastarynan, sonyń ishinde qazaq tiliniń latyn álipbiine kóshetini týraly qorytyndy pikirinen kókeiimizde júrgen suraqtarymyzǵa jaýap alǵandaimyz. Urpaq keleshegin oilasaq, ulttyǵymyzdyń negizgi belgisiniń biri - tilimizdi saqtap qalamyz desek, álemniń ozyq elderi igiligin kórip, kópshiligi qoldap otyrǵan latyn álipbiine bizdiń de kóshkenimiz kezek kúttirmeitin másele ekendigi aiqyn», - deidi professor.
Sondyqtan Muratbek Imanǵazinov, elimizdiń jarqyn bolashaǵyna baǵyttalǵan Elbasynyń «Bolashaqqa baǵdar: rýhani jańǵyrý» atty maqalasyndaǵy usynystar, aitylǵan oilar ómirimizge jańasha serpin beretin batyl qadam dep baǵalaidy.
