Qazirgi Qazaqstandy Keńes odaǵy ydyraǵan ótken ǵasyrdyń 90-jyldaryndaǵy Qazaqstanmen salystyrýǵa bolmaidy. Bizde osyndai qiyndyq týǵanda eshkimge alaqan jaimaý úshin, urpaq qamy, el bolashaǵy úshin jinaqtalǵan Ulttyq qor men altyn-valiýta qorynda 90 milliard AQSh dollary bar. QR Tuńǵysh Prezidenti – Elbasy Nursultan Nazarbaev «Birlese bilgen el bárin jeńedi» atty maqalasynda osylai dep málim etti, dep habarlaidy "Ult aqparat".
Elbasy qazaqstandyqtarǵa úndeýinde elimizdi Keńes odaǵy ydyraǵan ótken ǵasyrdyń 90-jyldaryndaǵy Qazaqstanmen salystyrýǵa bolmaitynyn, el bolashaǵy úshin jinaqtalǵan Ulttyq qor men altyn-valiýta qorynda 90 milliard AQSh dollary bar ekendigin atap ótti.
«Retimen, únemdi paidalanar bolsaq, ol búgin basymyzǵa túsken taǵdyr men tarih synynan eńsemizdi tik ustap ótýimizge mol múmkindik beredi.
El Prezidenti Qasym-Jomart Kemeluly Toqaev halyqqa arnaǵan taiaýdaǵy úndeýinde barlyq áleýmettik toptarǵa, kásipkerlerge, aýyl sharýashylyǵy salasyna kórsetiletin alýan túrli kómek týraly jan-jaqty maǵlumat berdi. Eger Qazaqstannyń ulttyq ekonomikadaǵy qol jetkizgen tabystary men joǵaryda atalǵan qor qurylmasa, munyń biri de bolmas edi. Kezinde sonyń bárin taratyp bereiik degender de bolǵan, biraq ómir biz qabyldaǵan sheshimniń durys bolǵanyn kórsetti», - dedi Nursultan Nazarbaev.
Elbasy Úkimet pen jergilikti atqarýshy organdardyń ýaqytsha qiyndyqtan shyǵýǵa barlyq kúsh-qýatty jumyldyrýy qajettigin atap ótti.
«Endi Úkimet pen jergilikti atqarýshy organdary sony únemdi túrde, ret-retimen oryndaýǵa kirisýi kerek. Ár ministr, árbir oblys, qala jáne aýdan basshylary júiemen, tártippen, úilesimmen, naqty josparmen, nyq senimmen áreket etip, ýaqytsha qiyndyqtan shyǵýǵa barlyq kúsh-qýatty jumyldyrýy qajet. Nur Otan partiiasynyń músheleri de osy bir saýapty istiń aldyńǵy qatarynan tabylýy tiis», - dedi Elbasy.
