Úkimet koronavirýspen kúresý úshin buryn-sońdy bolmaǵan aýqymdy sharalar atqarýda. Bul týraly «Habar 24» telearnasynyń tikelei efirinen QR Aqparat jáne qoǵamdyq damý ministri Dáýren Abaev aitty, dep habarlaidy QazAqparat.
«Qurmetti otandastar! Ózderińiz bilesizder, Úkimet koronavirýspen kúresý úshin buryn-sońdy bolmaǵan aýqymdy sharalar atqarýda. Adamdar da úiinen shyqpai ómir súrýge úirenip jatyr. Kópshiligimiz qashyqtan jumys isteýge kóshtik. Jaǵdai kúrdeli, sondyqtan barshańyzdyń kómegińiz kerek», - dedi ministr.
Onyń atap ótýinshe, ol úshin mamandar aitqan qarapaiym keńesterdi jasaý qajet.
«Qolyńyzdy jii jýyńyz, ár jýǵanyńyz 20 sekýndtan kem bolmasyn. Úiden shyqpańyz. Dalaǵa shyqsańyz, maska kiińiz jáne adamdarmen 2 metr aralyqty saqtańyz. Kópshilik bolyp jinalmańyzdar. Qazir toi toilaityn, qydyratyn ýaqyt emes. Osy qarapaiym sharalardy jasaý arqyly sizder ózińizdiń, jaqyndaryńyzdyń ómirin saqtai alasyzdar», - dedi ol.
Sonymen qatar Dáýren Abaev búgin Bilim jáne ǵylym ministri Ashat Aimaǵambetov qazaqstandyq ata-analarǵa karantin ýaqytynda balalarymyzǵa kóbirek kóńil bólip, birge kitap oqýǵa, paidaly videolar kórýge shaqyrǵanyn eske saldy.
«Qajetti materialdardyń tizimin de berdi. Bul keremet bastamany qoldaý kerek dep sanaimyn. Úide bolaiyq, aman bolaiyq. Biz birgemiz!», - dedi ministr.
