Qazaqstandyq ekonomister men qarjygerler "Teńgeniń quldyraýyn Ulttyq bank tejep qala ala ma" degen suraqqa jaýap berdi jáne qazaqstandyqtarǵa keńes aitty, - dep habarlaidy Tengrinews.kz tilshisi.
Qarjy taldaýshysy Andrei Chebotarev Ulttyq banktiń teńge baǵamyn turaqtandyrý jónindegi is-áreketin oń baǵalaýǵa bolatynyn aitty. Valiýta boiynsha saýda-sattyqtyń neǵurlym kesh ýaqytqa aýystyrylýy teńgeden Resei ekonomikasyna jasalǵan qysym men sanktsiialardan bolatyn birinshi soqqynyń aýyrtpalyǵyn jeńildetti.
"Demalys kúnderi engizilgen sanktsiialardy eskere otyryp, saýda-sattyq rýblmen emes, teńgemen bastalsa, bizdiń valiýta alǵashqy aýyr soqqyny qabyldaityn edi. Ýaqyt boiynsha bizdiń birjadaǵy saýda-sattyq Máskeý birjasyna qaraǵanda úsh saǵat buryn bastalýy kerek edi, biraq olar 15:00-de ashyldy. Nátijesinde birinshi soqqy rýblge tidi, al biz jappai teńge satyp alýdan aýlaq boldyq. Búgin saýdada bir dollar úshin 550, 570, tipti 600 teńge belgilegen bankter boldy, biraq biz ortasha ólshegende baǵam 495 teńge deńgeiinde qalǵanyn jáne Ulttyq bank is-áreketinde óziniń tiimdiligin kórsetkenin kórip otyrmyz", - dedi Chebotarev.
Ol qazir baǵanyń ósýinen qorqyp, turmystyq tehnika nemese kólikti satyp alý-almaýdy árkim ózi sheshetinin aitty.
"Baǵa ósip, qazir bir nárse satyp alý arqyly jaqsy jeńildik alýyńyz múmkin. Alaida nesiege jappai valiýta alýǵa keńes bermes edim, óitkeni qaryzǵa batyp kete alasyz", - dedi qarjy sarapshysy.
Ekonomist jáne AERC bas direktory Jánibek Aiǵazin ulttyq valiýtaǵa qatysty jaǵdai Ulttyq banktiń baqylaýynda jáne qarjy retteýshisi syrtqy faktorlardy eskere otyryp, baǵamǵa áser etedi dep sanaidy.
"KASE baǵamy 495 teńge deńgeiinde belgilendi, bul rette saýda-sattyq kóleminiń 62 paiyzy (jalpy saýda 160 million dollarǵa) Ulttyq banktiń interventsiialary esebinen qamtamasyz etildi. Ulttyq bank baǵamdy tómenirek qoia alatyn edi, biraq retteýshi Foreks baǵamy men kross-baǵam rýbl/teńge siiaqty basqa da faktorlarǵa qarap otyr. Osy faktorlarǵa sáikes 1 dollar 500 teńge shamasynda saqtalady", - dedi Aiǵazin.
AERC bas direktory rýbl kúrt quldyrap, onymen bailanysty teńge de arzandasa úreiden aýlaq bolý kerek ekenin aitty. Ekonomistiń sózinshe, áitpese Ulttyq bank valiýtalyq saýda-sattyqty birneshe kúnge toqtata turýy qajet.
"Qazir kóp kásiporyn aqshasyn dollarǵa aiyrbastap aldy, tipti ainalym qarajatyn aýystyrdy, óitkeni bizde ishki aiyrbastaýǵa shekteýler joq. Qazir barlyǵy valiýtamen otyrady, al eger olar osy valiýtany ótkize bastasa, baǵam turaqtanýy múmkin jáne bir dollarǵa 500 teńge bolmaidy. Eń bastysy, dúrbeleń bolmaýy kerek. Saýda-sattyqta baǵam qaita stratosferaǵa ushsa, valiýtalyq operatsiialardy bir-eki kúnge toqtatý kerek. Bul ekonomikalyq sebepterge bailanysty", - dedi Jánibek Aiǵazin.
