Qazirgi kezde turǵyndar koronavirýsqa qatysty basqa elderde bolǵan eski videolardy bizde bolǵan dep taratýda. Bul týraly QR Aqparat jáne qoǵamdyq damý ministri Dáýren Abaev málim etti, dep habarlaidy "Ult aqparat".
«Qazir koronavirýsqa qatysty feik jańalyqtar kóbeiip ketti. Azamattar ózderi de baiqamai eski videolardy, basqa elderde bolǵan oqiǵalardy bizde bolǵan dep oilap, taratýda. Ártúrli jalǵan aýdiojazbalar tarap jatyr. Oǵan keibir adamdar senýde. Bunyń barlyǵy qoǵamda úrei týǵyzady. Sondyqtan, taǵy da qaitalap aitamyz, tek resmi aqparat kózderin qarańyzdar. Sol jerdegi málimetke ǵana senińizder», - dedi ministr «Habar 24» telearnasynyń tikelei efirinen.
Osy oraida ol qazir barlyq politsiia departamentterinde osyndai jalǵan aqparattardy jáne ony jariialaǵan adamdardy anyqtaityn arnaiy jumys toptary bar ekenin eske saldy.
«Búginde elimizde osyndai derek boiynsha 41 is qozǵalyp, tergeý júrgizilýde. Barlyq kináli adamdar zańǵa sáikes jazalanady», - dedi Dáýren Abaev.
