Búgin kúsh atasy Qajymuqan Muńaitpasulynyń týǵanyna 150 jyl toldy, dep habarlaidy "Ult aqparat".
Qajymuqan Muńaitpasuly 1871 jyly 7 sáýirde Aqmola ýezi, Saryterek bolysyna qarasty Jádik degen jerde dúniege kelgen. Álemdik arenada alǵash ret 1906 jyly Almaniiada ótken dúniejúzilik saiysta jeńimpaz ataný arqyly áigili bolǵan palýan dúniejúziniń chempiondary Ivan Poddýbnyi, Ivan Shemiakin, Aleks Aberg, Ivan Zaikin, Georg Lýrih, Pol Pons syndy palýandarmen kúresken. Bar ǵumyryn kúres ónerine arnap, kózi tirisinde ańyzǵa ainalǵan batyr babamyz jaily kei derekterge qaraǵanda, kúrestiń birneshe túrinen 54 memlekette kúresip, 48 medal oljalaǵan. Ol 1948 jyly Túrkistan oblysynyń Ordabasy aýdanynda ómirden ozdy. Palýan babamyzdyń tórt áielinen taraǵan urpaq búginde Túrkistan men Aqmola óńirinde turyp jatyr.
Ǵalym, professor Áýelbek Qońyratbaevtyń jazbalarynda Qajymuqannyń salmaǵy – 174 keli, boiy – 195 sm, keýdesiniń aýmaǵy – 146 sm, baltyrynyń aýmaǵy – 49 sm, moinynyń jýandyǵy – 56 sm, bas aýmaǵy – 65 sm, ortańǵy saýsaǵynyń uzyndyǵy – 14 sm, ortańǵy saýsaǵynyń jýandyǵy – 10 sm, ústińgi jáne astyńǵy erinderi – 12 sm, aiaq kiimi 54 ólshemdi dep kórsetilgen.
Jalpy, Qajymuqan Muńaitpasulyn ulyqtaýǵa arnalǵan sharalar elimizde turaqty túrde ótkizilip turady. Mysaly, Mádeniet jáne sport ministrligi jergilikti atqarýshy organdarmen birlesip qazaq kúresinen Q. Muńaitpasulyn eske alýǵa arnalǵan jastar arasynda dástúrli sporttyq týrnirlerdi jyl saiyn uiymdastyrady. Biyl da respýblikalyq jáne halyqaralyq týrnirlerdi joǵary deńgeide, sondai-aq ulttyq sport oiyndaryn, Qajymuqanǵa arnalǵan kórmeler jáne basqa is-sharalar ótkizý josparlanǵan.
«Rýhani jańǵyrý» baǵdarlamasy aiasynda Túrkistan oblysy ákimdiginiń qoldaýymen túsirilgen «Kúsh atasy – Qajymuqan» atty animatsiialyq film 2017 jyldan bastap kórsetilip keledi. Qajymuqan Muńaitpasulynyń ómiri jaiynda «Qajymuqan» atty kórkem film túsirilip, ol 2021 jyldan bastap elimizdiń telearnalarynan kórsetilýi kózdelgen.
Túrkistan oblysynda Q.Muńaitpasulyna arnap 7 eskertkish qoiylǵan. 2019 jyly Aqmola oblysynyń Stepnogorsk qalasynda da palýanǵa eskertkish ornatyldy.
Biyl kúsh atasy Qajymuqan Muńaitpasulynyń 150 jyldyǵyna orai Túrkistan oblysynyń Ordabasy aýdanynda úlken keshen salynady.
Batys Qytai – Batys Eýropa halyqaralyq kólik dálizi boiynan boi kóteretin keshenge Temirlan aýylyndaǵy mýzei kóshirilip, 5 gektardy quraityn aýmaq týristik orynǵa ainalady.
Qazaq dalasy batyrynyń atyna salynatyn zamanaýi úlgidegi memorialdyq keshen kitaphana, kórme zaly, qonaq úi, ashana, konferents zaly, sport zaly, sportshylardyń kiim aýystyrýǵa, jýynýǵa arnalǵan jáne basqa da qajetti bólmelermen qamtylmaq. Ǵimarat aýmaǵy jasyl-jelekke oranyp, demalys ornyna ainalady. Sporttyń birneshe túrimen shuǵyldanýǵa laiyqty keshen túrli deńgeidegi jarystardy ótkizýge de yńǵaily bolmaq.
