28 tamyzda Tashkent áýejaiynda qajylyq jasaý úshin Saýd Arabiiasyna Musylmandar dini basqarmasynyń ruqsatynsyz barǵan 35 azamat ustaldy. Ustalǵandardyń biri Azattyqtyń Ózbek qyzmetine olardy memlekettik qaýipsizdik qyzmeti ókilderi toqtatqanyn, tólqujattaryn alyp, jeti saǵat suraq-jaýap alǵan soń bosatqanyn aitty.
Tashkent áýejaiynda ustalǵandardyń biriniń aitýynsha, arnaiy qyzmet ókilderi odan "qajylyqqa kimmen barǵanyn, qajylar tobyna kim jetekshilik etkenin, sapar úshin qansha qarajat tólegenin, ol jaqta kimmen kezdeskenin" suraǵan.
"Suraq-jaýap kezinde olar bizge tashkenttik Davron esimdi saqaldy jigitti kórsetip, "myna jigitke qansha tóledińder?" dep surady. Osy kezde aramyzda bolǵan áielderdiń biri aiǵailap sóilei bastady: "30 jyl boiy qajylyqqa barý kezegimdi kúttim, aqyrynda kezekke iline almadym. Biz ol jaqta jaman nárse jasaǵan joqpyz ǵoi, qajylyq kezinde prezidenttiń saýlyǵy úshin duǵa tiledik" dedi. Onyń sózinen keiin jaǵdai sál jeńildegendei boldy. Bizdi ol jaqta jeti saǵat ustady, bárimizdiń tólqujattarymyzdy alyp aldy. Sosyn tólqujattaryńdy suraq-jaýapqa shaqyrylǵan kezde militsiia bólimshelerinen alasyńdar dep úiimizge jiberdi", - dedi ustalǵandardyń biri.
2017 jyly 7 maýsymda qabyldanǵan din isteri jónindegi komitet erejesine sáikes, ózbek azamattaryna kishi jáne úlken qajylyq jasaý úshin Mekkege Musylmandar dini basqarmasynyń ruqsatynsyz jeke firmalar arqyly barýyna tyiym salynǵan. Osy erejege sáikes, Ózbekstandaǵy Saýd Arabiiasy elshiligi de ózbek azamattaryna dini basqarmasynyń ruqsatynsyz viza berýdi toqtatqan.
Alaida bul shekteýlerge qaramastan sońǵy eki jylda ózbek azamattarynyń Dýbaidaǵy jeke firmalardan viza alýǵa ótinish alyp, qajylyqqa barýdy jalǵastyryp jatqany jaily ara-tura habarlamalar taraǵan.
Tashkent áýejaiynda ustalǵandardyń biri Mekkege Musylmandar dini basqarmasy arqyly barý óte qymbat ekenin, shamamen tórt myń AQSh dollar turatynyn aitqan.
Ózbekstandaǵy Musylmandar dini basqarmasynyń qajylyqpen ainalysatyn bóliminiń ókili Saidakmalhon Shakirov áýejaidaǵy ustaýlar jaily habarsyz ekenin aitty. Ol jeke firmalardyń kómegimen qajylyqqa barý zańsyz ekenin eskertken.
Azattyqtyń Ózbek qyzmeti bas prokýratýra men memlekettik qaýipsizdik qyzmetinen jaýap ala almady.
2017 jyly Ózbekstanda qajylyqqa barý boiynsha kvota sany 40 paiyzǵa artqan iaǵni, 5200 adamnan - 7200 adamǵa deiin kóbeigen. Jańa erejege sáikes, elde kishi jáne úlken qajylyqqa qaitalap barýǵa tyiym salynǵan.
Buǵan deiin Ózbekstanda Mekkege barý úshin kóp azamattardyń jyldar boiy kútetinin jazǵan edik. Keibir azamattar bul saladaǵy jemqorlyqqa da shaǵymdanǵan.
